Një tjetër skandal ka ndodhur në radhët e SHÇBA, pasi një oficerë i cili hetonte policët që shkelin ligjin, vetë ishte nën hetim nga autoritetet gjermane për drogë.
Specialisti i Shërbimit për Çështjet e Brendshme dhe Ankesat, me inicialet S.M u përjashtua nga shërbimi pas informacioneve të mbërritura nga policia gjermane, e cila konfirmoi që e kishte nën hetim për drogë, shkruan Syri.
Për specialistin në fjalë, autoritetet gjermane kishin lëshuar më herët edhe një urdhër ndalimi. Drejtori i SHÇBA, Muhamet Rrumbullaku, i pyetur nga media në lidhje me skandalin, nuk dha asnjë përgjigje.
Ditën e djeshme, SHÇBA njoftoi zyrtarisht se kishte rënë pre e një sulmi kibernetik në serverin qëndror të institucionit, por ngjarja mësohet se ka ndodhur 8 ditë më parë dhe është mbajtur larg syrit të publikut.
Sipas SHÇBA, sulmi është parandaluar, por risku që informacione sensitive për policinë që shkelin ligjin apo bashkëpunojnë me krimin, mbetet i lartë dhe mund të kenë përfunduar në duar të pasigurta.
