Kryeministri Edi Rama, në mbledhjen e parë të qeverisë, ka preferuar që të flasë për Kodin e Etikës. Rama ka kërkuar nga të gjithë anëtarët e kabinetit që të respektojnë Kodin e Etikës, duke filluar nga udhëtimet jashtë shtetit, deri te pushimet.
Po ashtu u ka kërkuar që të respektojnë rregullat e qarkullimit rrugor dhe të mos drekojnë në orarin e punës. Penalizimet për ata që shkelin rregullat, do të jenë të rënda pasi në rast përsëritje mund të shkarkohen nga detyra.
“Të gjithë qytetarë ta dinë, qeveria ka një Kod Etik që është një mënyrë jetese për ministrat për respektin ndaj qytetarëve. Në rast se një ministër e thyen këtë rregull duhet që të kërkojnë ndjesë publike, dhe në rast se përsëritet duhet të lirojë vendin. Dua të theksoj se këto rregulla vlejnë për mua dhe i kam respektuar këto 8 vite dhe nuk e kam problem që t’i repsketojë dhe për 4 vite të tjera”, tha Rama.
Udhëtimet
“Nuk mund të organizohen festa me paratë e shteti, apo që të ndërmarrin udhëtime turistike ku postojnë foto. Asnjë udhëtim me lekët e shtetit, për asnjë drejtues institucioni. Për çdo shkelje etike do të parashikohen ndëshkime dhe sanksione. Të gjitha shpenzimet e çdo institucioni që nuk raporton shpenzimet kur udhëton jashtë, nuk do të paguhet nga shteti. Nuk mund të ikësh dhe të vish për punë shteti dhe të mos regjistrohet asgjëkund”, tha Rama.
“Asnjë anëtar i qeverisë nuk duhet të udhëtojë në biznes klas, pushimet jashtë vendit, jo darka në restorante kur janë në punë në Tiranë. Do të përcaktohen shprehimisht të gjitha detajet për të gjitha këto çështje. Duhet përcaktuar se bashkëshortët dhe fëmijët e anëtarëve të kabinetit nuk mund të përdorin sallën VIP të aeroportit përveçse kur janë me ministrat. E njëjta gjë vlen edhe për përdorimin e makinave zyrtare.Nëse nuk respekton një prej këtyre pikave ministri përgjegjës duhet të kërkojë ndjesë, në rast përsëritje duhet të japë dorëheqjen, shtoi kreu i qeverisë.
“Mos kundërshtoni ligjet e qeverisë”
“Në procesin e diskutimeve në Kuvend është absurde që një ministër të kundërshtojë ligjin e qeverisë se medemek dëmton sektorin që ai mbulon. Ka vetëm një sektor, dhe ky sektor është Shqipëria”, shtoi.
“Mos u merrni me akuzat e opozitës”
Rama u ka dhënë porosi ministrave që të mos merren me akuzat e opozitës. Më tej, u ka kërkuar që të mos shkelin ligjin, pasi do të përballen me pasojat, por u shpreh se do të mbështesë dhe do të mbrojë këdo kur sulmohet padrejtësisht. Po ashtu, u kërkoi të gjithëve që të mbajnë larg familjet nga zyrat e shtetit dhe të mos bëjnë favore për askënd.
“Politika nuk ka lindur si një mollë sherri, por si një mundësi që qeniet njerëzore të bëjmë punë. Ne kemi 4 vite kohë për t’i bërë gjërat që nuk janë bërë siç nuk janë bërë me parë. Nuk duhet të humbasim asnjë orë kohë për akuzat e opozitës, e lagu s’e lagu. Shumë shpejt do të kemi një faqe online të re dhe çdo ministër duhet që çdo ministër do të përgjigjet me shkrim për çdo akuzë dhe do të mbajë përgjegjësi ligjore dhe morale. Unë po të jap një porosi, ministër nuk bëhesh vetë dhe të bën kryeministri. Kush shkel në dërrasë të kalbur punën e ka me organet ligjzbatuese. Kjo është porosia ime, unë do të mbështesë të gjithë për të arritur objektivat e përbashkëta. Do të ruaj të gjithë, por askush nuk duhet që askush të shkel në dërrasë të kalbur. Familja ime nuk ka punë me shtetit, ndaj u lutem që të mbani dhe ju larg familjet tuaja dhe të mbani larg familjet nga zyrat e shtetit”, tha Rama.
