Kryeministri Edi Rama dhe Presidenti Ilir Meta shfaqen të ftohtë me njeri-tjetrin në pamjet e publikuara nga Presidenca, të betimit të qeverisë së re.
Kryeministri Edi Rama dhe ministrat e kabinetit të ri janë betuar këtë të Shtunë te Presidenti Ilir Meta.
Pas betimit në Presidencë, janë drejtuar drejt kryeministrisë ku do zhvillohet edhe mbledhja e parë e kësaj qeverie. Rama, mbajti një fjalim para mbledhjes ku u kërkoi anëtarëve të kabinetit të qeverisë zbatimin e Kodit të Etikës.
“Anëtarët e Këshillit të Ministrave u betuan sot para Presidentit të Republikës, Sh.T.Z Ilir Meta, sipas procedurës kushtetuese. Me dorën mbi Kushtetutën e Shqipërisë, Kryeministri Sh.T.Z Edi Rama dhe anëtarët e tjerë të Këshillit të Ministrave u betuan se: ‘Betohem në nderin tim, se do të zbatoj me përpikëri Kushtetutën dhe ligjet, si dhe do të kryej me përgjegjësi detyrën shumë të rëndësishme që më është besuar, të anëtarit të Këshillit të Ministrave!’ Gjatë kësaj ceremonie solemne ishin të pranishëm Kryetari i Kuvendit, Sh.S.Znj. Lindita Nikolla dhe anëtarët e Kabinetit të Presidentit të Republikës”, njoftoi zyra e shtypit pranë Presidencës.
