Presidenti Ilir Meta e cilësoi ish-kryeministrin Sali Berisha “si vera”. Sipas tij, sa më shumë vite kalojnë, aq më shumë demokrat Berisha bëhet.
Në përfundim të një aktiviteti në Korçë, Meta mbajti një prononcim për gazetarët. I pyetur për zhvillimet në PD, Presidenti tha se: “Nuk dëshiroj të merrem me çështje të tilla se s’është kjo detyra ime”, por shtoi se “sigurisht që zoti Berisha, s’mund ti rri pa thënë që është si vera, sa më shumë kohë kalon aq më tërheqës bëhet, por dhe aq më demokrat bëhet”.
“Demokracia problematike”
Meta vlerësoi se demokracia në vend është në një gjendje problematike. “Situata me demokracinë në vend është në një gjendje problematike, nuk është sic do të donin shumë përshi edhe mua pas 25 prillit, por padiskutimin është më mirë se para 25 prillit, në kushtet e mungesës së një parlamenti kushtetues e funksional. zero opozitës. Aktualisht pas 25 prillit, janë mundësitë për rivendosjen e plotë të demokracisë, për një parlament funksional dhe ai është qëllimi im kryesor”, u shpreh Meta, ndërsa apeloi për kujdes ndaj situatës me pandeminë në vend.
Mesazhi për opozitën
Meta theksoi se protagonizmi i tij në dy vitet e fundit ishte i imponuar në mbrojtje të Kushtetutës, por se askush nuk duhet të presë që Presidenti të marrë përsipër detyra që i takojnë aktorëve të tjerë politikë, duke kërkuar që opozita të marrë përgjegjësitë e saj.
“Nuk jemi këtu për të interpretuar dhe nxjerrë jashtë kontekstit çfarë kam thënë unë. Jam këtu për të respektuar Kushtetutën. Kam kërkesa nga gazetarët për intervista, por e kam gjykuar të panevojshme pas 25 prillit për arsye se unë besoj se i gjithë protagonizmi im jo i zakonshëm në 2 vitet e fundit, nuk ka qenë i kërkuar nga Ilir Meta, por i imponuar në mbrojtje të demokracisë, të Kushtetutës, në kushtet e braktisjes nga opozita të të gjitha institucionet, por edhe në kushtet e përpjekjeve të pandalshme të maxhorancës për të kapur çdo institucion, në mënyrën më të veçantë Gjykatën Kushtetuese, për të kapur dhe institucionin e Presidentit që para zgjedhjeve dhe për të krijuar një situatë të pashpresë për demokracinë, ndryshimin dhe qytetarët. Jam i detyruar të respektoj kushtetutën e Republikës së Shqipërisë. Aktualisht askush nuk duhet të presë që presidenti të marrë përsipër detyra që i takojnë aktorëve të tjerë politikë. Shpresoj që opozita të përmbushë përgjegjësitë e saj në parlament, që ai të jetë funksional që sistemi i llogaridhënies të funksionojë në interes të publikut dhe institucionet e tjera të marrin veten”, deklaroi Meta.
Dekorimi
Gjatë aktivitetit në Korçë, Kreu i Shtetit ka dekoruar të përndjekurit Ylber Merdani, Shpresa Ballolli Merdani, Nevruz Golka dhe Petrit Bazelli. Në fjalën e tij, Meta është shprehur se ata janë shembull i vetëdijes qytetare e kombëtare, si dhe shembull frymëzimi për brezat e sotëm e të ardhshëm.
