“Grupi për PD” ka dalë kundër vendimit të Lulzim Bashës për të përjashtuar ish-liderin Berisha nga partia. Grupi e cilëson antistatuor vendimin e kreut të opozitës dhe e quan përgjegjës për humbjen e zgjedhjeve të 25 prillit. Në deklaratë, thuhet se PD-ja e marrë peng duhet t’i kthehet demokratëve dhe akti i parë dhe i menjëhershëm drejt këtij reformimi është dorëheqja e Bashës.
“Grupi për PD” ka anëtarë të njohur si kritikë të Bashës, mes tyre ish-Presidenti Nishani, ish-kandidatja për kreun e PD Edith Harxhi, ish-ministri demokrat Arben Imami, etj.
Deklarata
Grupi për PD shprehet se ka ndjekur me shqetësim zhvillimet e ditëve të fundit në Partinë Demokratike. Vendimi i fundit i Kryetarit në detyrë të Partisë Demokratike, sipas tyre, është antistatutor dhe në vazhdën e të gjitha vendimeve antistatutore e antidemokratike të ndërmarra që prej vitit 2017.
Në reagim thuhet se, Lulzim Basha është përgjegjës për humbjen e zgjedhjeve të 25 prillit 2021 nëpërmjet pazareve dhe marrëveshjeve fitimprurëse me Edi Ramën, për përfitim personal. Ndërsa “masakra zgjedhore”, sipas tyre, ishte alibia e rradhës për të mbuluar këto pazare.
“Për këto arsye dhe shumë të tjera, Partia Demokratike duhet të ringrihet dhe reformohet si një parti e djathtë bashkëkohore, me një projekt të ri të bazuar në idealet e themelimit të saj. PD-ja e marrë peng duhet ti kthehet demokratëve dhe anëtarësia e saj e gjerë dhe e pandikuar, e pakushtëzuar, duhet të vendosë mbi të ardhmen e saj. Dorëheqja ose largimi i Lulzim Bashës nga pozitat e Kryetarit në detyrë duhet të jetë akti i parë dhe i menjëhershëm drejt këtij reformimi”, shkruhet në deklratë.
“Krijimi i një Këshilli Drejtues të përkohshëm, kthimi i votës dhe i mendimit të lirë në parti, si dhe ringritja e të gjitha forumeve të PDSH-së nëpërmjet zgjedhjeve të lira, janë të domosdoshme për ringritjen e Partisë dhe kthimin e besimit. Reformimi i PD-së do të vijë nga bashkimi i të gjithë kontributeve dhe vlerave ndër vite, konkurenca e lirë dhe meritokracia në Parti. Ne vlerësojmë se Shqipëria ka më tepër se kurrë nevojë për një opozitë të fortë, të pakapur dhe të pandikuar dhe kjo bëhet vetëm me hapjen e Partisë dhe kthimin e institucionit të votës së lirë”, mbyllet reagimi.
