Hetimet për tenderin abuziv prej 2.8 miliardë lekë të uniformave të Policisë së Shtetit janë shtrirë drejt këtyre të fundit. Zyrtarët e Ministrisë së Brendshme, të arrestuar më herët, kanë pretenduar se është Policia e Shtetit që ka dhënë specifikimet teknike dhe çmimet, duke i ngarkuar me përgjegjësi. Ndërkohë këtë të mërkurë SPAK pyeti një prej të arrestuarave, Mimoza Çekrezi, e cila ka treguar edhe shkresat e mbajtura me Policinë
Prokuroria e Posaçme shtrin hetimet për tenderin e uniformave në drejtim të zyrtarëve të Drejtorisë së Përgjithshme të Policisë së Shtetit, ndërsa vazhdon të marrë dëshmi dhe të kryej verifikime në bazë dokumentacioni, raporton Syri Tv.
Këtë të mërkurë SPAK pyeti ish zyrtaren Mimoza Çekrezi e vënë në pranga më herët për shkeljet e konstatuara në tenderin 2.8 miliardë lekë që prodhoi uniforma pa cilësi dhe që nuk plotësonin kërkesat e efektivëve në terren.
Sipas Cekrezit specifikimet teknike dhe çmimet janë përcaktuar nga Policia e Shtetit dhe ata si institucion, kanë ndjekur kërkesat e Policisë. Më tej, ish zyrtarja i ka thënë hetuesve të SPAK që kërkesat dhe përcaktimet teknike, i gjejnë në shkresën numër 55, në dosjen e tenderit.
Të paktën dy zyrtarë të tjerë janë duke u verifikuar si persona nën hetim nga SPAK, një ndër të inxhinieria tekstile e Policisë së Shtetit.
Kanë qenë deklarimet e personave të arrestuar, që po i japin indicie SPAK për identifikimin e personave të tjerë që mund të jenë të implikuar në abuzimin me tenderin e uniformave të Policisë, ndërsa më herët Prokuroria tentoi të bëjë të penduar disa nga zyrtarët e arrestuar.
