PD: Qeveria po gjobit bizneset që mbështetën Partinë Demokratike në zgjedhje

Flamur Hoxha - Foto (PD)

Partia Demokratike ka denoncuar sulmet e vazhdueshme të qeverisë, që sipas saj, po i bëhen bizneseve që në fushatën zgjedhore dolën në krah të PD.

Gjatë një reagimi për mediat, sekretari për klimën e biznesit në PD, Flamur Hoxha hodhi akuza ndaj qeverisë, e cila sipas tij, po i trajton bizneset si armiq përmes gjobëvenies dhe presioneve.

Hoxha e mbyll fjalën e tij duke thënë se Rama ka dalë kryeministër si pasojë e “masakrës zgjedhore”.

“Korrupsioni, klientelizmi, gjobat kanë përkeqësuar gjendjen e biznesit, por shumë prej tyre ndodhen në këtë periudhë në sulm të vazhdueshëm nga qeveria si kundërshtarë politikë. Denoncimet e ardhura në Partinë Demokratike dëshmojnë për një fushatë selektive të qeverisë kundër bizneseve që u deklaruan në fushatën zgjedhore pro ndryshimit dhe dolën në krah të Partisë Demokratike. Sot, shumë prej këtyre bizneseve po trajtohen si armiq. Përmes gjobvënies në zyrat e bashkive dhe të tatimeve, po tentohet hakmarrja me presion, nënshtrim, ose falimentim e shumë bizneseve në Tiranë dhe disa prej qyteteve kryesore të vendit”, tha ai.

LEXO EDHE  Bylykbashi: Reforma territoriale vjen pas asaj të sistemit zgjedhor, interesi personal ka vr*rë atë publik

“Partia Demokratike i bën thirrje qeverisë të ndalojë këtë praktike primitive. Bizneset duhen lënë të qetë të punojnë mes kaq shumë vështirësive që u ka krijuar keqqeverisja e Edi Ramës. U bëjmë thirrje bizneseve ta refuzojnë presionin nga kushdo qoftë ai! Partia Demokratike do të jetë në krah të çdo sipërmarrësi që punon për të rritur ekonominë. Gjobat politike janë të papranueshme! Ato rrënojnë biznesin dhe ekonominë e vendit. Goditjet selektive, trajtimi i bizneseve si armiq dhe kundërshtarë politikë nuk e zgjidh hallin e Edi Ramës. Ai është kryeministri i një pakice të dalë nga një masakër zgjedhore, me një ekonomi në krizë, me fare pak investime të huaja dhe me besimin më të ulët historik nga bizneset”, shtoi Hoxha.