Kuvendi miratoi në seancën e sotme drejtuesit e Komisioneve Parlamentare, ku opozita do të ketë drejtimin e 3 nga 8 komisionet e përhershme parlamentare.
Debati në seancë u bë lidhur me përbërjen e Komisioneve, pasi sipas kreut të Grupit Parlamentar socialist, Taulant Balla, nuk ruhej raporti mazhorancë-opozitë. Balla pretendoi se opozita me deputetët që ka propozuar del se ka ose barazim ose më shumë deputetë në Komisione, gjë që nuk përputhet me numrat e deputetëve në Komisionet Parlamentare.
Ky qëndrim i Ballës shkaktoi debate në Kuvend, ndërsa opozita braktisi seancën, pas ndryshimit të rendit të ditës së Kuvendit, duke e cilësuar këtë si një shkelje të Rregullores.
Drejtuesit e Komisioneve të Përhershme Parlamentare vijojnë si më poshtë:
Klotilda Bushka drejtuesja e Komisionit të Ligjeve (PS)
Nasip Naço kreu i Komisionit të Sigurisë (PS)
Mimi Kodheli kryetare e Komisionit të Jashtëm (PS)
Eduard Shalsi, kryetar i Komisionit të Ekonomisë (PS)
Arben Pëllumbi, kryetar i Komisionit të Veprimtarisë Prodhuese (PS)
Jorida Tabaku, kryetare e Komisionit për Integrimin Europian (PD)
Albana Vokshi, kryetare e Komisionit për Shëndetësinë (PD)
Agron Gjekmarkaj, kryetar i Komisionit për Edukimin dhe Median (PD)
