Këtë të premte siç ishte parashikuar do të zhvillohet seanca e parë plenare me deputetët e rinj të zgjedhur në zgjedhjet e 25 prillit.
Seanca e parë do të jetë në orën 10, ku pritet të ketë më së shumti një atmosferë formale, pasi do të nisë procesi i verifikimit të mandateve të ligjvënësve dhe betimit të tyre. Kjo do të jetë seanca e parë, pas të cilës do të thërritet një e dytë, në të cilën do të votohet kryetari i ri i Kuvendit. Mësohet se seanca e dytë do të nisë rreth orës 17:00.
Çështjet që Partia Demokratike pritet t’i ketë me prioritet për të diskutuar, janë ndryshimet kushtetuese, reforma zgjedhore dhe territoriale, pasi sipas opozitës, këto 3 çështje kanë pasur ndikimin e tyre në humbjen e zgjedhjeve.
Ndërkohë kujtojmë se në Kuvend në seancën e parë nuk do të jenë 140 deputetë pasi disa prej tyre kanë lënë mandatin e deputetit.
