Pas vetëofrimit të Kryeministrit Edi Rama për të strehuar afganët në Shqipëri, sikundër ai ka deklaruar, tashmë një vetëofrim ka shfaqur ministrja e Jashtme, Olta Xhaçka, e cila shprehet e kënaqur nëse afganët do të qëndrojnë përgjithmonë në Shqipëri.
Ndoshta Xhaçka mund të jetë ministrja e parë në Europë që shprehet në këtë formë, pa pyetur askënd, ndonëse vendime të tilla janë përtej mandatit të një Qeverie.
“Partnerët kanë sugjeruar përballimin e kostove nga ana e tyre. Për momentin janë duke u trajtuar me të njëjtat kosto që kanë pasur shqiptarët pas tërmetit” tha Xhaçka për VOA.
E ndërsa në fillim u tha se afganët do të qëndrojnë vetëm disa muaj në Shqipëri dhe më pas u miratua vendimi për një vit, ministrja u shpreh se strehimi në Shqipëri mund të kalojë mbi 12 muaj.
“Është një proces që mund të kërkojë deri në 12 muaj ndoshta edhe më shumë. Mes strehimit dhe procesimit të tyre, do të ketë një kohë të konsiderueshme. 12 muaj do të jenë minimumi për të mos thënë që do të zgjasë edhe më shumë se aq”, tha ajo.
Olta Xhaçka tha se do të ishte e kënaqur nëse një pjesë e afganëve do të dëshironin që të qëndronin përgjithmonë në Shqipëri.
“Patjetër, ua thashë që bëhet fjalë për elitën kulturore, shoqërore të Afganistanit. Janë gazetarë, mjekë, financierë, inxhinierë, etj. Janë kualifikime me të cilat do të aplikonin për programe të emigracionit në cdo vend.
Ne kemi shprehur gatishmërinë për t’i pranuar me kushtin apo dëshirën e shprehur për të vazhduar drejt SHBA-së, por nëse do të shprehin dëshirën të qëndruar do të ishim shumë të kënaqur që ta bënin Shqipërinë shtëpinë e tyre”, u shpreh Xhaçka.
Deri tani në Shqipëri janë akomoduar 662 afganë nga 4 mijë që pritet që të vijnë në total.
