A do të jetë ish-Kryeministri Sali Berisha pjesë e Grupit Parlamentar të PD-së, pasi Ambasadorja amerikane në Tiranë, Yuri Kim, i ka kërkuar largimin nga kjo parti dhe dorëzimin e mandatit të deputetit, pas shpalljes së emrit të tij në “listën e zezë”?
Lulzim Basha deri më tani ka shmangur një përgjigje, sikundër edhe komentet publike, ndërsa ish-Kryeministri Sali Berisha në çdo dalje të tij, ka pohuar se do të jetë në Kuvend si një deputet i votuar dhe gjithashtu do të jetë pjesë e Grupit Parlamentar të PD.
Berisha madje deklaroi se ai s´mund të jetë në Kuvend si deputet i pavarur ose jashtë grupit parlamentar të PD, duke shtuar se “nëse një vendim i tillë do të merret, pra përjashtimi, atëherë ai do të angazhohej me çdo gjë, brenda formatit ligjor dhe Kushtetues, për t´a kthyer PD në një parti të parimeve”.
Berisha ka thënë se Lulzim Basha në takimin me diplomaten amerikane ka kërkuar prova dhe fakte, ndërsa vetë kreu demokrat ka shmangur çdo koment apo deklaratë lidhur me çështjen.
Por Gerti Bogdani, anëtari i Kryesisë së PD, në studion e Abc, ka pohuar se vendimi për z. Berisha do të bëhet publik nga Lulzim Basha më 10 shtator, pra ditën kur nis punimet edhe legjislatura e re në Kuvendin e Shqipërisë.
Mbledhja e paralajmëruar e Kryesisë së PD, e cila ishte njoftuar javën e shkuar është shtyrë për një tjetër moment, sikundër edhe një mbledhje e Grupit Parlamentar demokrat, i cili duket se do të mblidhet në ditën kur do të nisë punimet edhe Parlamenti.
Gjithsesi referuar deklaratave të deritanishme, Berisha do të jetë një prej deputetëve të Parlamentit shqiptar, dhe vështirë se do ketë një vendim për t´a përjashtuar nga Grupi Parlamentar.
