Shifrat e fundit në vendin tonë tregojnë një rritje të infektueshmërisë për shkak të Covid-19. Mjeku Kita Sallabanda tha për Ora News se dy janë faktorët që kanë ndikuar në rritjen e numrit të rasteve me Covid; lëvizja e lirë e turistëve dhe emigrantëve drejt Shqipërisë dhe përhapja e variantit Delta.
“Nëse Shqipëria kishte shifra shumë të mira, ardhja e turistëve shtuan numrin e të sëmurëve me Covid. Tani është futur varianti Delta i cili ka një infektueshmëri më të madhe. Janë këta dy faktorë që bën të mos kemi shifrat e janarit, por të kemi një rritje të personave të infektuar”, theksoi Sallabanda.
Përsa i përket vaksinimit te gratë shtatzëna, Sallabada tha se janë bërë studime dhe është parë se nuk ka efekte negative vaksinimi i tyre. Për më tepër, sipas studimeve imuniteti që merr nëna përmes vaksinës i kalon edhe foshnjës në rastin kur është shtatzënë, dhe fëmijës kur e ushqen me gji.
“Janë bërë studime për efektin e vaksinave të gratë shtatzëna dhe kanë parë që nuk ka efekte negative. Nëpërmjet qarkullimit të gjakut, imuniteti që merr gruaja shtatzënë i kalon edhe fëmijës. Po ashtu edhe ato nëna që kanë fëmijë të vegjël dhe i ushqejnë me gji janë të rekomanduar në Spanjë që të bëhet vaksina. Kështu nëpërmjet qumështit të nënës i kalon imuniteti edhe fëmijës. Njerëzit kanë të drejtë të kenë pikëpyetje, kjo është humane, por unë mendoj siç rekomandojnë specialistët në gratë shtatzëna duhet bërë sepse ndihmon atë, ndihmon dhe fëmijën. Nuk është 100% e vërtetuar, por ka shumë të dhëna që e vërtetojnë këtë”, shtoi ai.
Në rastet që nuk ka probleme të imunitetit, sipas Sallabandës nuk ka nevojë për dozë të tretë vaksine.
