Skandali i ish-Ministrit të Shëndetësisë në Angli, Matt Hancock që puthej në zyrë me sekretaren e tij duket se ende nuk ka kaluar. Teksa Hancock u kthye sot në parlament, dha fjalimin e parë pas dorëheqjes nga detyra.
Por, kur ai fliste me superlativa për kryeministrin Boris Johnson dhe reformën në kujdesin social, kolegët nuk i mbajtën dot të qeshurat dhe hilaritetin në sallë.
“Britanikët do të fitojnë dinjitetin me reformën e kujdesit social”, tha ministri i dorëhequr, ndërsa salla shpërtheu në të qeshura.
Hancock u detyrua të linte kabinetin në 26 qershor pas publikimit të pamjeve nga “The Sun” ku ai shfaqej duke shkëmbyer puthje të nxehta me sekretaren e tij gjatë periudhës së pandemisë.
