Shëndetësia falas është një nga ato premtimet e mëdha të Kryeministrit Edi Rama, i cili madje e përdori si një arritje të madhe në letër për të marrë mandatet e qeverisjes. Por pandemia e Covid-19 rrëzoi të gjithë propagandën e Rilindjes, ku mijëra shqiptarë që u përballën me koronavirusin u detyruan të paguajnë miliona për medikamentet që përdoreshin për kurim, duke u lënë në mëshirë të fatit nga shëndetësia e riilindur e Ramës dhe Ogerta Manastirliut.
E ndërsa sërisht Rama dhe Manastirliu vijojnë show dhe propagandën me vaksinat, emisioni Stop ka denoncuar atë që ndodh në qendrat shëndetësore në Tiranë, atje ku edhe kryhen vaksinimet.
Në qendrën shëndetësore numër 11, në Bregun e Lumit, qytetarja bën vaksinë Pfizer, pasi thotë, se i duhet të shkojë në Zvicër.
Për këtë shërbim, që propaganda e Rilindjes thotë se është falas, shefi i qendrës Besjan Shehu merr 20 mijë lekë të vjetra.
Kamera e fshehtë e emisionit “Stop” u ndal në disa qendra shëndetsore. Në qendrën numër 7, qytetarja arrin të marrë një raport shëndetësor, duke i thënë mjekut, se i duhej, pasi do të martonte vëllanë në Sarandë. Qytetarja e merr dokumentin e kërkuar me diagnozën e sëmundjes në veshka.
Në Qendrën Shëndetsore në Kamëz, sigurohet një raport 10 ditor, duke paguar 10 mijë lekë të vjetra e me diagnozën Bronkopneumonia sinistra.
