Rekordi i 36 ndeshjeve pa humbje, Mançini nuk justifikon barazimin: Një moment i mallkuar

Foto: Reuters

Roberto Mançini e ka të vështirë që të kapërdijë nervozizmin që i shkaktoi ky rast i madh i humbur përballë Zvicrës. Trajneri i Italisë pranon se ndoshta mjaft prej lojtarëve të tij janë të lodhur, por ajo që nuk arrin të kuptojë dhe ngre sytë nga qielli kur e pyesin është fakti se si arritën kampionët e Europës të mos e fitojnë takimin e djeshëm në Bazel.

“Nuk ka mundësi. Besoj se është një moment i mallkuar për ne, pasi nuk ka mundësi që të mos fitojmë një ndeshje si kjo me Zvicrën në të cilën ndërtuam të paktën gjashtë ose shtatë raste të pastra për gol, pa llogaritur penalltinë.

Është një moment ku topi nuk kërkon të hyjë në rrjetë, pasi kur mendoj vetëm për atë rastin e Berardit apo edhe për goditjen e Insinjes ngjitur me shtyllën, plus tentativën e Zhorzhinjos nga 11- metrat, nuk di se si ta shpjegoj ndryshe pse nuk kthehemi në Itali me tri pikë.

Kjo ishte një nga ato ndeshje që nuk duhej gabuar kurrsesi, por përsëri mendoj se ashtu si me Bullgarinë na mungoi ligësia përpara portës. Dominuam takimin në çdo detaj, skuadra bëri një ndeshje teknikisht madhështore, por goli as që dukej në horizont.

Ndoshta, në 30 minutat e fundit nisëm të ndiejmë disi edhe lodhjen, duke mos shkuar të kthjellët para portës, prandaj kundër Lituanisë do të bëj disa ndryshime në formacion.

Sa i nervozuar jam? Nuk jam i nervozuar, por nuk kam as se si të jem i lumtur. Më djeg që të mos fitoj një ndeshje të cilën e luajtëm me një portë, por tani duhet të reagojmë fort të gjithë”, deklaroi.

LEXO EDHE  Europa League/ Ozil hesht Gjermaninë, kalon në avantazh Fenerbahcen ndaj Frankfurtit