Pavarësisht hapjes së një tuneli të ri në sheshin “Shqiponja”, situata me trafikun mbetet problematike. Jo vetëm kjo, por devijimi i ri i trafikut e ka rënduar edhe më shumë.
Te “Sheshi Shqiponja”, u hap javën e kaluar tuneli numër pesë! Lajmi u paraqit me bujë nga Ministrja e Infrastrukturës, Belina Balluku. Përmes një videoje të montuar nga punonjësit e zyrës së saj të shtypit, ajo u shfaq edhe në edicionet e lajmeve në televizionet kombëtare. Për hapjen e tunelit, postoi plot tre reagime në faqen e saj në FB. Një prej tyre ja huazoi dhe kryeministrit Edi Rama, i cili i shoqëroi pamjet me komentin: “S’ka kohë për pushim”.
Ministrja u duk teksa parakaloi me krenari në asfalt dhe foli për “stabilizim trafiku”.
“Hapet për qarkullimin e automjeteve tuneli numër 5 duke lehtësuar qarkullimin e automjeteve në hyrje të Tiranës. Ndërkohë janë drejt përfundimit punimet për realizimin e plotë të kësaj vepre e cila i jep kryeqytetit një hyrje të denjë duke lehtësuar trafikun për automjetet dhe lëvizjen për këmbësorët”, shkroi ajo krahas pamjeve të postuara në rrjetin social FB.
Trafiku vijon
Ndërkohë, situata në terren shfaqet krejt ndryshe nga ajo ç’ka propagandohet nga Balluku e Rama. Trafiku është i rënduar thuajse gjatë gjithë kohës si në pjesën e rrugës para se të hysh te tunelet (kur vjen nga autostrada Durrës-Tiranë), por edhe në dalje të tyre. Edhe sot, ashtu si çdo ditë pas hapjes së tunelit të ri, pati një situatë të rënduar trafiku te “Sheshi Shqiponja”.
Problem sinjalistika
Për më tepër, drejtues të automjeteve ankohen për mungesë sinjalistike, ç’ka shton dhe më shumë kaosin e trafikut në këtë pjesë të kryeqytetit. Kur futesh në Tiranë nga autostrada, një tabelë në hyrje të tuneleve sinjalizon drejtimet, por për drejtuesit e mjeteve simbolet janë të vogla dhe nuk dallohen.
“Hera e parë që e bëj këtë rrugë, sinjalistika nuk dallohet, u futa në Lapurakë dhe u ktheva sërish mbrapsht për të shkuar në Unazë”, deklaroi për mediat një drejtues automjeti.
Nga ana tjetër, burime pranë policisë pranuan problemet me sinjalistikën e dallueshme dhe thanë se kanë kërkuar nga kompania që po kryhen punimet, që të punojë për qartësimin e sinjalistikës.
Autoriteti Rrugor Shqiptar u mjaftua me një postim në rrjetet sociale për të sqaruar devijimin e ri të trafikut pas hapjes së tunelit, por ka rezultuar totalisht e pamjaftueshme për të shmangur keqkuptimet te drejtuesit e automjeteve.
