Ish-kandidati për kryetar i Partisë Demokratike, Fatbardh Kadilli, deklaron se PD duhet të ketë një qëndrim të qartë në raport me ish-kreun e saj Sali Berisha, të shpallur non grata nga DASH.
Kadilli shprehet se nuk mund të presim vendime surprizë për një çështje që lidhet me të ardhmen e PD-së, ndërsa shton se “e ardhmja e PD nuk duhet të jetë non grata”.
Përmes një postimi në rrjete sociale, ai shkruan:
E ardhmja e PD-së nuk duhet të jetë “non grata”.
PD duhet të ketë një qëndrim të qartë në raport me ish kreun e saj Sali Berisha. Nuk mund të presim vendime surprizë apo të minutës së fundit për një çështje që lidhet me fatin dhe të ardhmen e PD-së. As nuk mund të zvarritemi pa bërë asgjë.
Berisha e ka bërë të qartë që fatin e PD-së do ta mbajë lidhur me fatin e vet “non grata”. Basha nuk flet duke e lënë partinë në kryqëzime të rrezikshme politike.
Eshtë momenti të flasë partia çfarë qëndrimi ka për ish-kryetarin “non grata”. Kjo është detyrë e Kryesis dhe e Grupit Parlamentar. Për secilin koleg, është nder të ulesh në karriken e kryesisë dhe të deputetit, por së pari është përgjegjësi.
Keni në dorë të merrni një vendim historik. Luhet fati dhe e ardhmja e Partisë Demokratike që nuk duhet të jetë “non grata”.
