Kancelarja gjermane Angela Merkel do të zhvillojë në 14 shtator një vizitë zyrtare në Shqipëri, ku pritet të mblidhen në Tiranë, liderët e Ballkan Perëndimor në kuadër të Procesit të Berlinit.
Merkel inicoi procesin e Berlinit disa vite më parë duke kërkuar nga drejtuesit e vendeve të Ballkanit Perëndimor që të realizonin një proces bashkëpunimi dhe reformash me synim krijimin e kushteve sa më të favorshme për lëvizjen e lirë, thithjen e investimeve, lëvizjen e mallrave etj.
Por, ajo që nisi si Procesi i Berlinit, nisi të zëvendësohej nga i ashtëquajturi shengeni Ballkanik dhe më pas nga “Open Balkan”, një inisiativë që bashkoi vetëm 3 vende, Serbinë, Maqedoninë e Veriut dhe Shqipërinë, ndërsa nuk iu bashkua Mali i Zi, Kosova dhe Bosnja.
E ndërsa Merkel pritet të ketë takime në Tiranë me Kryeministrat apo Presidentët e vendeve të Ballkanit Perëndimor, raportohet se një takim kancelares gjermane i është kërkuar edhe nga kreu demokrat Lulzim Basha.
Nga raportimet mësohet se kërkesa zyrtare i është përcjellë ambasadorit gjerman në Tiranë, Peter Zingraf, i cili pak më shumë se 1 vit më parë u angazhua në një proces negociatash me kreun demokrat Lulzim Basha, për të pranuar të ashtëquajturën marrëveshjen e 5 qershorit mes partive politike, e cila u inicua nga Këshilli Politik, vijoi diskutimet në rezidencën e ambasadores amerikane në Tiranë, dhe u përmbyll me angazhimin e diplomatit gjerman.
Nuk dihet nëse takimi mes kreut demokrat Lulzim Basha dhe kancelares gjermane do të mund të realizohet, ndonëse duket se ka një angazhim të dyanshëm për zhvillimin e tij, me ndihmën edhe të një prej fondacioneve gjermane, që shpesh ka asistuar Partinë Demokratike në hartimin e programeve apo nismave të ndryshme.
Angela Merkel do të jetë kancelare e Gjermanisë deri në fund të shtatorit, ndërsa drejtoi vendin lider të BE-së për 3 mandate rradhazi.
