Ish-Kryeministri Sali Berisha u shpreh sot se Partia Demokratike duhet t´i imponohet Edi Ramës për të ndryshuar reformën territoriale.
Në emisionin “Now”, Berisha tha se Rama dhe PS nuk do të dëshironin kurrë ndryshimin e reformës territoriale, ndaj Lulzim Basha dhe PD duhet t´ia imponojnë realizimin e saj.
Ish-Kryeministri gjithashtu tha se reforma zgjedhore, e cila prej vitit 1992 bëhet pas çdo procesi zgjedhor, duhet të realizohet me konsensusin e palëve, por PD dhe Basha sërisht duhet të imponohen, pasi në të kundërt në zgjedhjet e ardhshme parlamentare, Rama do të dyfishojë batërdinë zgjedhore.
“Nëse PD nuk i imponohet dhe të vendosi Ramën nën presion, të bindë ndërkombëtarët për masakrën e 25 prillit dhe të vendosin sanksione ndaj Ramës, nuk do të ketë më opozitë”, tha Berisha.
Ndërkohë lidhur me ndryshimet Kushtetuese të 2008 dhe deklaratat e Bashës që ka folur për një reformë Kushtetuese, Berisha tha se ato ishin demokratike, përderisa realizuan rotacionin politik në 2013.
“Nuk është problemi te ndryshimet Kushtetuese përsa i takon rotacionit, ka përgjegjësi edhe partia lidhur me rezultatin zgjedhor”, u shpreh Berisha.
