Në spitalin “Covid3”, i cili u vu në funksionim pas shtimit të rasteve me koronavirus në vend, po trajtohen 8 pacientë. Ky spital ka një kapacitet prej 150 shtretërish, ndërsa këtu do të trajtohen pacientët që kanë kaluar rrezikun e jetës nga Covid-19.
Ashtu si në muajt e parë të pandemisë, edhe tani, duket se ky spital do të shërbejë për rehabilitimin e pacientëve, që pasi kalojnë rrezikun e jetës, duhet të rikuperojnë pasojat e lëna nga virusi, që aktualisht po qarkullon në variantin Delta.
Atyre iu shërbejnë mjekët që kishin në spitalin infektiv, ndërsa infermierët janë marrë nga shërbime të ndryshme të QSUT.
Pavarësisht se sanatoriumi prej kohësh nuk shërben më si spital Covid, aty po trajtohet një numër mjaft i lartë personash, të cilët po trajtohen për pasojat që ka lënë në mushkëri koronavirusi.
Aktualisht vendi po përballet me një tjetër valë të Covid-19, e cila sipas ekspertëve brenda pak ditësh do të ketë një trend në rënie, por nuk dihet nëse vjeshta mund të sjellë një përkeqësim të shifrave ditore lidhur me rastet e reja, veçanërisht atyre që duan trajtim spitalor.
Në vend, të paktën deri ditën e djeshme, numëroheshin 11628 raste aktive, ndërsa nga fillimi i pandemisë kanë humbur jetën 2512 persona, sipas statistikave të Ministrisë së Shëndetësisë.
