Tre ditë më parë, u nda nga jeta reperi i njohur grek, Mad Clip pas një aksidenti fatal në Atikë. Ai po kthehej nga dasma e shokut të tij.
Reperi 34-vjeçar, i cili është i apasionuar pas shpejtësisë, është përplasur teksa po udhëtonte me makinën e tij ‘Porsche’. Pasi kaloi katër semaforë të kuq, makina që po ngiste, devijoi nga rruga dhe u përplas në një shtyllë dhe më pas me një pemë. Përplasja ishte tepër e fortë, pasi mjeti thuajse u shkatërrua plotësisht dhe grupit të hetimit iu desh kohë të zbulonte që viktima ishte reperi, emri i vërtetë i të cilit është Peter Anastasopoulos.
12 zjarrfikës shkuan në vendngjarje me 4 automjete, të cilët e liruan reperin pa ndjenja nga rrënojat e automjetit pas dy orësh.
George Polydorou, miku i reperit Mad Clip, ka folur për momentin kur mori lajmin për vdekjen e tij.
“E njihnim njëri tjetrin prej dy vitesh dhe ishim miq mjaft të mirë. Ai ishte dhe do të jetë një njeri shumë i rëndësishëm për mua. Mësova për aksidentin e tij gjysmë ore pasi kishte ndodhur, sepse e dinin që ishim miq të mirë. Nxitova menjëherë për në vendin e aksidentit, por e gjeta të vdekur, nuk kishte puls. Ata u përpoqën për rreth dy orë ta mbanin në jetë. Pyesja policinë dhe zjarrfikësit nëse kishte puls, nëse do kthehej në jetë.. E pashë aty në makinë. Kishte gërvishtje, ishte i mbuluar në gjak. Po shpresoja për një mrekulli.
Problemi i vetëm për të ishte mënyra e jetesës që zgjodhi, e cila e çoi në një rrugë pa krye. Fatkeqsisht, atij i pëlqeu shpejtësia.. Kam dëgjuar të thuhet që kur ndodhi aksidenti ai po konfliktohej me dikë, gjë krejt normale kur flitet për të, por nga sa mësova, nuk pati përplasje. Mbase ai humbi kontrollin për gjëra qe nuk i dimë”- tha ai për Gazzetta.
