Kjo javë do t’i hapë udhë legjislaturës së 10 të Kuvendit, përmes seancës së parë parlamentare, e më tej votimit e dekretimit të Qeverisë së re të prodhuar nga zgjedhjet e 25 prillit.
Më 10 shtator, të premten e ardhshme bëhet mbledhja e parë e Kuvendit, e cila deri në zgjedhjen e Kryetarit të Kuvendit kjo mbledhje hapet dhe drejtohet nga deputeti më i vjetër në moshë. Me shumë gjasa do të jetë deputetja Luljeta Bozo ajo që do të çelë punimet. Më tej 3 deputetë, me moshën më të re, caktohen nga drejtuesi i seancës të kryejnë përkohësisht detyrën e Sekretarisë së Kuvendit deri në zgjedhjen e Byrosë së Kuvendit.
Me hapjen e mbledhjes së parë, drejtuesi i seancës i njofton Kuvendit emrat e personave të zgjedhur dhe kërkon verifikimin e mandateve të tyre. Më pas një Komision i përkohshëm për Verifikimin e Mandateve të anëtarëve të Kuvendit, që përbëhet nga 9 deputetë shqyrton dokumentacionin përkatës të zgjedhjeve dhe brenda 2 ditëve i paraqet Kuvendit në seancë plenare raportin për vlefshmërinë e mandateve të deputetëve të Kuvendit.
Menjëherë pas verifikimit të mandateve deputetët ftohen të bëjnë betimin për të vijuar me zgjedhjen e Kryetarit të ri të Kuvendit, i cili duhet të propozohet nga të paktën 15 deputetë.
Menjeherë pas verifikimit të mandateve, Presidenti i Republikës emëron Kryeministrin me propozim të partisë, që ka shumicën e vendeve në Kuvend. Më pas Kryeministri i emëruar i paraqet për miratim Kuvendit, brenda 10 ditëve, programin politik të Këshillit të Ministrave së bashku me përbërjen e tij. Pas miratimit nga Kuvendit, para fillimit të detyrës, Kryeministri, zëvendëskryeministri dhe ministrat betohen para Presidentit të Republikës. /SCAN/
