Në javën që sapo u mbyll, referuar shifrave zyrtare të Ministrisë së Shëndetësisë kanë humbur jetën si pasojë e Covid-19, 23 pacientë.
Ndërkohë janë raportuar 6160 raste të reja me Covid përgjatë 7 ditëve, ndërsa aktualisht në Shqipëri numërohen rreth 12 mijë persona aktivë me Covid-19.
Java nisi me 3 humbje jete dhe 486 raste të reja, por e hëna, ka pasur edhe numrin më të ulët të testimeve.
Të martën, nga 7,256 testime rezultuan pozitive 1054 raste të reja. Gjithashtu u raportuan 3 humbje jete.
Të mërkurën, nga 5724 testime rezultuan pozitive 982 raste të reja. Gjithashtu u raportuan 3 humbje jete.
Të enjten, nga 5637 testime rezultuan pozitive 853 raste të reja. Ministria e Shëndetësisë raportoi 4 humbje jete.
Të premten nga 5901 testime rezultuan pozitive 895 raste të reja, ndërsa u raportuan 3 humbje jete.
Të shtunën nga 6113 testime rezultuan pozitive 984 raste të reja dhe 4 humbje jete.
Ditën e sotme, pra e diel, nga 4228 testime rezultuan pozitive 896 raste të reja dhe u raportuan 3 humbje jete.
Kjo javë rezulton me numrin më të lartë të humbjeve njerëzore nga Covid-19 në të paktën 4 muajt e fundit, ndërkohë që në spitale ndodhen 132 pacientë, nga të cilët 14 në gjendje të rënduar.
Prej të paktën dy muajsh në Shqipëri, referuar raportimeve zyrtare, qarkullon varianti Delta i Covid-19, ndërsa ekspertë të pavarur, shprehen se vendi po kalon një valë të koronavirusit, e cila mendohet se gjatë ditëve në vijim do të vijë duke u ulur.
Por në vjeshtë me shumë gjasa, përderisa Covid-19 është një virus respirator, vendi mund të përballet me një tjetër valë, por që sipas ekspertëve, për shkak të imunizimit natyral apo vaksinave, nuk do të jetë në nivelet e vjeshtës dhe dimrit të shkuar.
