Pas karrierës në modeling dhe me shumë kurora miss-i Atalanta mbylli një sezon të suksesshëm si moderatore sportive. Në këtë intervistë ajo zbulon se çfarë fshihet pas shkëlqimit të kamerave, prapaskenat dhe rivalitetet. Në një bisedë shumë të sinqertë, ajo rrëfen për vështirësitë e të ‘mbijetuarit’ në ekran, por edhe ambicjet e saj për këtë fushë. Duket se kjo verë e ka gjetur single, duke mos pasur një mashkull në krah. Natyrisht që ngacmimet për të vijnë edhe nga rradhët e meshkujve VIP, por vështirë se mund të mësojmë një emër prej saj.
Teksa bëhet gati për sezonin e ri, Atalanta në një intervistë per Bluetooth në Gazeta Shqiptare zbulon detaje nga formati që këtë vit do të sjellë në ekran.
Keni pasur një sezon të ngjeshur, si ka qenë ky vit për Atalantën?
Më shumë sesa të ngjeshur do ta përshkruaja si një sezon të suksesshëm. Prezenca ime tek “Procesi Sportiv”, mund të them që më futi në një tjetër botë, atë të sportit. I kaloja ditët duke lexuar rreth futbollit dhe netët duke parë ndeshjet. Kështu dashur pa dashur u bëra “profesionte” veç se sportdashëse. Këtë vit u mbajt dhe Kampionati Europian dhe ditët ishin edhe më intensive. Ka qenë një eksperiencë që më rriti profesionalisht por edhe e kam shijuar.
Mendoni se sot femrat, sidomos gazetaret e sportit paragjykohen, duke qenë një sport kaq mashkullor?
Po shtohen përditë e më shumë femrat që merren me gazetari sportive, a është në modë, apo është e vetmja hapësirë që gjendet në televizion?
Më besoni që televizioni ka aq shumë hapësira sa kush ka vendosur të bëhet pjesë e gjen një format, apo një fushë të preferuar. Nuk di të them për rrugëtimin e vajzave të tjera të sportit, por në rastin tim ka qenë dëshira për të eksploruar në një sektor të ri. Unë vij nga bota e spektaklit, kam provuar ndjesinë e pasarelave, kam rrëmbyer kurora kombëtare dhe ndërkombëtare, pra mund të them me shoëbizzin kam arritur gjithçka çfarë kam dashur. Natyrisht në politikë apo aktualitet nuk e gjeja veten, ndaj provova sportin, si një fushë komplet të re dhe sot pas një experience të caktuar mund të them krenarisht që ia kam dal.
Ku ndryshon kjo botë, nga spektaklet e bukurisë?
Veç përmbajtjes, që nuk ka asnjë lidhje me njëra-tjetrën, pjesa tjetër mund të them është e njëjta. Në të dyja botët ka energji, ka ambicje, ka rivalitete dhe ‘brryla’.
Kujt i referoheni kur thoni ‘brryla’?
Besoj se në çdo fushë ka edhe dashakeqësi. Në televizion mbi të gjitha. Ambicja dhe dëshira për të qenë imazh shpesh edhe të ‘shndërrojnë’. Ti shpesh sheh nëpër koridore buzëqeshje të shtirura, apo më keq akoma biseda nën zë. Nuk më shqetësojnë, madje nëse e zonja ti suportosh këto situate, atëherë je rritur profesionalisht.
Sot në showbizz ke më shumë shoqe apo rivale?
Kam kolege. Kam nga ato që shkëmbejmë një kafe para pune dhe nga ato që nuk shkëmbejmë as një përshëndetje. Por në fund të ditës jemi kolege dhe respektojmë punën dhe hapësirën e njëra tjetrës. Ndërsa shoqe kam plot jashtë botës së famës dhe faleminderit Zotit që jam e rrethuar me miq të mirë.
Si i sheh sot vajzat e ekranit, specifikisht vajzat e sportit?
Më vjen mirë që shoh përditë imazhe të reja dhe më vjen keq që shpesh shoh vetëm vajza të bukura dhe bosh. Mendoj që në ekran duhet të dalësh pasi ke arritur disa hapa të rëndësishme në karrierë, ke testuar veten shkallë-shkallë, ke investuar në arsimim dhe më e rëndësishmja të kërkosh më shumë sesa fama në ekran.
Ke menduar ndonjëherë të heqësh dorë nga televizioni?
Patjetër që po. Ekrani është ndalesa ime e fundit për të përmbushur ekon time profesionale, por natyrisht që nuk të rri gjithë jetën. Unë në profesion jam arkitekte dhe paralelisht vijoj karrierën time në profesionin për të cilin jam diplomuar. Besoj se do të tërhiqem kur të vijë momenti i duhur dhe kur të jem realizuar.
Flasim pak për jetën private, si është statusi i Atalantës?
Kjo verë më gjeti single, por shumë të lumtur.
Si janë raportet me meshkujt e famshëm, ju ngacmojnë?
Nuk besoj se të qënurit i famshëm ka ndonjë ndryshim nga meshkujt e zakonshëm. Ka patur ngacmime dhe nga personazhe të njohur, por mos më kërkoni emra.
Ndërkohë vini gjithnjë seksi në fotot tuaja, a mendoni se shqiptarët janë ‘velur’ nga këto poza?
Do të jepja të drejtën nëse nuk do të kishin sukses këto poza. Mendoj që nuk e egzagjeroj në ato që poston dhe nuk tregoj më shumë sesa duhet. S’jam personazh i skandaleve, apo i fotove hot. Por jemi në verë, foto me bikini besoj se duan të shohin të gjithë.
Ku do t’ju gjej shtatori?
Që mos të përsëris atë fjalinë ‘cliché’ e kam surprizë, po ju zbuloj pak. Këtë sezon po përgatis një format komplet tjetër, ku në qendër do të jenë histori njerëzore, natyrisht jo histori të dhimbshme, por histori të bukura për t’u zbuluar. Edhe pak dhe gjithçka do jetë gati.
