Ditmir Bushati ka rezultuar si kandidati më i votuar nga anëtarët e Asamblesë Kombëtare të PS për të qenë pjesë e Kryesisë së Partisë Socaliste, edhe pse gjatë muajve të fundit ai ka mbajtur një qëndrim kritik ndaj shumë prej zhvillimeve në këtë parti, veçanërisht pas largimit si ministër i Jashtëm.
Bushati ka arritur të sigurojë 204 vota, duke u renditur i pari, me 1 votë më shumë se Arben Pëllumbi. Në këtë mënyrë duket se Rama ka rehabilituar “rebelin” Bushati, ndëshkimi për të cilin duket se ka qenë vetëm mospërfshirja në listën e kandidatëve për deputet në zgjedhjet e 25 prillit.
Bushati ka shprehur kritikat ndaj Ramës dhe Qeverisë që ai drejtonte veçanërisht për oligarkët, por duket se çështja që i ndau për disa kohë ishte ajo e ndryshimit të kufinjve mes Kosovës dhe Serbisë, ku ish-ministri i Jashtëm ka mbajtur një qëndrim kundër atij të shfaqur nga Kryeministri Rama.
Gjithashtu Asamblea Kombëtare e PS ka mandatuar për anëtarë Kryesie edhe Pandeli Majkon, Arben Pëllumbin, Armando Subashin dhe Ilir Beqajn.
Ajo që bie në sy është fakti se Fatmir Xhafaj ka mbetur jashtë Kryesisë së PS, sikundër edhe Pjerin Ndreu, Ervin Demo dhe Eduard Shalsi. Xhafaj, pavarësisht se arriti të thyejë herësin në listën e kandidatëve të PS së Tiranës, me suportin absolut të Erion Veliajt, duket se nuk arriti të marrë votat e nevojshme të anëtarëve të Asamblesë, për të qenë pjesë e forumit më të lartë drejtues politik, ku militon prej të paktën 20 vitesh.
Më herët u publikuan edhe rezultatet e votimit për gratë që ishin mandatuar si anëtare të Kryesisë, ku mes tyre më e votuara ishte Belinda Balluku, e cila duket se me suportin e Edi Ramës dhe Erion Veliajt, po spikat mes shumv prej kolegeve të saj, deputete apo ministre.
Gjithashtu pjesë e Kryesisë së PS do të jenë edhe Ogerta Manastirliu, Blerina Gjylameti, Evis Kushi, Olta Xhaçka dhe Mimi Kodheli.
Nga numërimi nuk ka mundur të zgjidhen në kryesi: Milva Ikonomi, Almira Gjembulla, Ermonela Fela dhe Klotilda Ferhati.
