“Do jetë ndeshje shumë e fortë. Polonia luan shumë mirë në fushën e saj, nuk humbet prej shtatë vitesh. Ne e dimë se po rritemi, jemi paraqitur mirë kohët e fundit, jemi ekip kompakt. Në sulm kemi lojtarë në formë dhe në mbrojtje kemi marrë gjithmonë komplimente”, u shpreh trajneri i kombëtares shqiptare Edy Reja, në prag të sfidës kundër Polonisë, e cila do të luhet nesër për eliminatoret e Kupës së Botës.
Reja ka zbuluar disa nga mënyrat se si kombëtarja shqiptare mund të luajë në këtë përballje, ndërsa u shpreh se Polonisë mund t´i hapim probleme duke i bërë presing në sulm.
“Nuk na lejohet asnjë gabim, ata janë shumë të fortë nga krahët. Të mos i lëmë hapësira dhe t’i godasim në kundërsulm.
Për Lewandowskin duhet organizim shumë i mirë nga ne. Është i jashtëzakonshëm në zonë. Krijon probleme të mëdha. Mbrojtësi e ka në kontroll dhe pas 12 sekonde kthen kokën dhe nuk e gjen më. Duhet ta markojë gjithë mbrojtja, nuk mjafton një lojtar”, tha tekniku kuqezi, duke mos fshehur frikën ndaj sulmuesit polak.
Dhe në këtë kuadër, Reja duket se ka edhe një urim kur u shpreh “shpresoj të mos jetë në ditën e tij”.
“Te Polonia e ka të vështirë të japë rendimentin që jep te Bayern, por vlerat e tij janë të padiskutueshme. Në një ndeshje nuk futesh asnjëherë me idenë e humbjes, por për të fituar apo marrë pikë.
Të japim më të mirën në këtë ndeshje. Që në nisje të kësaj faze kemi qenë të vendosur për të shkuar me synimin për të marrë pikë. Motoja jonë është ‘respekt për të gjithë, frikë për asnjë’. Me Souzan (trajneri i Polonisë) kemi raport të mirë dhe respekt me njëri-tjetrin.
Ne jemi një skuadër e mirë dhe grup kompakt dhe nuk futemi në këtë ndeshje për të qëndruar në mbrojtje.
Kemi armë të forta në sulm dhe mund të bëjmë keq. Nëse Polonia do na vërë në vështirësi do kthehemi, por kurrsesi nuk do futemi në fushë për të qëndruar në mbrojtje”, tha Reja.
