Miliona për puseta, Veliaj ndryshon kushtet në tenderin e UKT-së, mori pjesë vetëm një kompani

Agjencia e prokurimeve publike, zbulon një tjetër tender me probleme të dhënë nga Bashkia e Tiranes. Miliona leke për zhbllokimin e pusetave ne kryeqytet i janë dhënë “ONYX SHPK, të vetmes kompani në garë. Për me tepër institucioni vendor ndryshoi rregullat pasi u hap tenderi duke hequr kriterin e licencës profesionale për punime nëntokë.

Bashkia e Tiranës dhe institucionet në varësi të saj nuk i ndalin tenderat me procedura të dyshimta, edhe pse këto të fundit janë kritikuar shpesh në raporte të ndryshme por edhe nga vetë kryeministri Rama.

Sipas të dhënave në Agjencinë e Prokurimeve Publike rezulton se në 9 qershor Ujësjellës Kanalizime Tiranë ka çelur garën për hapjen dhe zhbllokimin e Pusetave me fond limit 19.9 milionë lekë.

Por vetëm një javë më pas, institucioni nën varësinë e Bashkisë së drejtuar nga Erion Veliaj, vendos lehtësimin e kritereve duke hequr detyrimin për të paraqitur një licencë profesionale lidhur me punimet e gërmimit në tokë.

LEXO EDHE  FOTO/ Humbi jetën teksa pushonte me familjen, ja kush është ushtaraku 27-vjeçar

Madje, duke e konsideruar gabim njerëzor, ndërmarrja e ujësjellës kanalizimeve të Tiranës, sqaron se në dokumentet e tenderit është kërkuar gabimisht marrja me qera e një fuoristrade pick up.

Më pas, me mbylljen e afatit për dorëzimin e ofertave rezulton se pjesëmarrja e vetmja dhe automatikisht edhe fituesja është kompania “Onyx shpk”.

Ky subjekt ka ofertuar më shumë se 19 milionë lekë për kontratën.

Edhe Open Data e ka sinjalizuar procedurën me flamurin e kuq, i cili shpreh një shqetësim për sjellje të paligjshme ose joetike.

Kjo është argumentuar me faktin se është konstatuar mungesë konkurrence në tenderin e zhvilluar nga Ujësjellës Kanalizime Tiranë.

Bashkia e Tiranës dhe institucionet në varësi të saj paraqiten si më problematiket në fushën e prokurimeve publike për shkak edhe të numrit të lartë të tenderave të zhvilluar por edhe për shkeljet e konstatuara shpesh herë në to.