Masat anti-Covid/ Aeroporti i Rinasit ka një njoftim të rëndësishëm për të gjithë udhëtarët

Aeroporti i Rinasit ka njoftuar të gjithë udhëtarëve që të paraqiten në aeroport tre orë përpara orarit të udhëtimit, për shkak të procedurave që zgjasin si pasojë e masave të marra nga Covid-19.

Njoftimi i plotë i TIA:

Në vëmendje të të gjithë pasagjerëve që udhëtojnë nga Tirana International Airport!

Duke marrë shkas nga rritja e fluksit të pasagjerëve që udhëtojnë nga TIA në këto ditë të sezonit veror, si dhe ardhjen e shumë bashkatdhetarëve nga jashtë, kontrollin e dokumentacionit për vendet që kanë vënë kufizime për pasaportat shqiptare – sidomos Italia – si dhe paraqitjen e testit PCR apo antigen në sportelet e TIA-s të pranimit të biletave – sipas kritereve të vendeve ku udhëtoni – sugjerojmë që paraqitja në aeroport të jetë 3 orë përpara udhëtimit.

Kjo kohë do të jetë e mjaftueshme që të organizoheni përpara fluturimit tuaj, qoftë për parkimin e automjetit tuaj, qoftë për kontrollin e dokumentacionit që kërkohet për vendet respektive ku udhëtoni.

Ju rikujtojmë se jemi në dispozicion të çdo pasagjeri për t’i shërbyer sa më mirë, e në të njëjtën kohë, mbetemi besnikë të durimit dhe bashkëpunimit, sepse kohërat janë të pazakonta dhe na duhen të gjithëve fuqi të pazakonta.

Ju falënderojmë për mirëkuptimin, Tirana International Airport!

LEXO EDHE  Basha publikon foton e Ramës nga helikopteri: Ia hoqi FA për udhëtimet e tij personale