Kryeministri harron masat anti-Covid/ Reagimi i çuditshëm i Ramës për protestën në Vlorë

Kryeministri Edi Rama ka reaguar lidhur me protestat në Vlorë, duke shpërfillur masat anti-Covid dhe justifikuar ndalimin e muzikës gjatë orëve të vona me argumentin se … shqetësohen turistët.

Kufizimi i orarit të muzikës në bare e restorante, një vendim i Komitetit Tenik i justifikuar si masë për parandalimin e përhapjes së koronavirusit, ka sjellë protesta në Vlorë mbrëmjen e djeshme. Pronarë të bareve e restoranteve në zonën e Lungomares kanë kërkuar që të hiqet kufizimi për luajtjen e muzikës, pasi kjo masë i çon drejt falimentit.

Të dielën mbrëma, bizneset protestuan me vendosjen e Himnit Kombëtar në ambientet e bareve e restoranteve të tyre. Përgjigjen e morën nga Policia, që zbarkoi nëpër objekte duke gjobitur disa syresh, e duke kryer shoqërime në komisariat.

Lidhur me protestat ka reaguar dhe kryeministri Edi Rama. Kreu i qeverisë, në përgjigjen e tij për kërkesën e bizneseve, nuk përmend në asnjë çast arsyen (atë të thënë në rrugë zyrtare) se muzika ndalohet si masë për parandalimin e Covid.

Jo! Lideri del me një tjetër teori: Muzika që transmetohet në këto biznese argëtimi është ndotje akustike dhe pengon turistët për të dëgjuar zhurmën e detit!

LEXO EDHE  Kancelari i ri në Gjermani, partia e Merkelit humbet shumë vota, ja rezultati deri më tani…

“Lungomare s’ka muzikë po ndotje akustike të tmerrshme ku përzihen dhjetra linja burime menjëherë. E drejta e atyre që duan zhurmë muzikore tërë natën nuk fiton dot mbi të drejtën e atyre që natën duan zhurmën e detit”, shkruan ai në postim në FB.

Më tej, duke anashkaluar sërish argumentin e Komitetit Teknik se muzika në orët e vona favorizon grumbullime e për pasojë rrezik të shtuar për përhapjen e COVID, ai fton organizime “në natyrë, në pika ku nuk shqetëson njeri”. Po ashtu, ‘mori kompetencat’ e Komitetit të Ekspertëve, duke njoftuar shtyrjen me 1 orë të kohës së transmetimit të muzikës në bare e restorante (nga ora 22:00, bëhet 23:00).

“Siç është lajmëruar, nga data 20 korrik muzika do të ndalet në 23.00 në çdo zonë turistike të banuar dhe kush do të kërcejë e të këndojë tërë natën po të dojë, le të organizohet në natyrë, në pika ku nuk shqetëson njeri – si në tërë botën e civilizuar turistike”, shkruan në rrjetin sociale.