Autoritetet kosovare ende nuk kanë një përgjigje se pse mbi 1 mijë persona të komunës së Deçanit po përjetojnë simptoma helmimi prej fundjavës së shkuar. Analizat paraprake përjashtojnë skenarin e helmimit prej ujit të pijshëm, siç pretendojnë vetë banorët e komunës.
Mbetet urgjente situata me banorët e helmuar masivisht në komunën kosovare të Deçanit, por janë ende të paqarta shkaqet e helmimit.
Në Qendrën Kryesore të Mjekësisë Familjare të komunës, vetëm në katër orët e para të mëngjesit u paraqitën 55 pacientë të rinj.
“Në 24 orët e fundit janë gjithsej 310 pacientë me simptomatologji të njëjtë siç kanë qenë ditëve përpara, ndërsa që nga data 10 deri me 14 janë gjithsej 1 mijë e 62 pacientë.”
Ndërsa ka mendime se bëhet fjalë për një epidemi sezonale, dyshimet e para për situatën kanë rënë mbi cilësinë e ujit të pijshëm që furnizohet nga një degë e ujësjellësit rajonal, por analizat laboratorike nuk e provojnë pistën e helmimit hidrik dhe janë vërejtur vetëm raste të kufizuara bakteresh të dyshimta në ujë.
Pacientët e pyetur nga agjencia e lajmeve “Ekonomia Online” shprehen të bindur se uji është shkaku për shtrimin e tyre në spital.
“Kur kom pi ujë mu ka përzi bargu kom pas të vjella, kryt po m’dhem. Tash ma mirë po nihna. Vetëm shkaku i ujit, jo nga ushqimi. Krejt familjen e kam të infektuar. Komplet familjen e kam të helmuar. Vet jam ma i fort.”
“Kjo ka ardhur shkaku i ujit. Gjithë fmailja janë me keto simptoma barkqitje, vjellje temperaturë. Gjëra të zakonshme. Jo nga ushqimi veq uj që kmei pi. Sa më parë të bëjnë një zgjidhje se marum. Edhe fëmijën e kam të shtrirë të tjerët janë në shtëpi. Ishalla bahet dicka.”
Prej së martës, autoritetet lokale kanë shpallur gjendjen e emergjencës në Deçan.
Ambasada amerikane i ka këshilluar qytetarët e vet të shmangin përdorimin e ujit nga ujësjellësi i komunës, ndërsa Instituti i Mjekësisë Ligjore i Kosovës po heton dy raste vdekjesh të papritura që dyshohet se ishin pasojë e helmimit masiv.
