Falsifikim dokumentash dhe pastrim parash, arrestohet drejtori i Agjencisë së Sigurisë

Drejtori i Agjencisë së Inteligjencës dhe Sigurisë në Bosnje dhe Hercegovinë, Osman Mehmedagic, u arrestua të mërkurën, konfirmoi Ministria e Punëve të Brendshme e Kantonit të Sarajevës.

Prokuroria e Bosnjës tha se i dyshuari Osman Mehmedagic u privua nga liria me urdhër të saj, raporton Shërbimi i Ballkanit i Radios Evropa e Lirë.

Zyra e Prokurorit tha se Mehmedagic dyshohet për veprat penale: keqpërdorim i pozitës ose autoritetit, falsifikim i dokumenteve dhe pastrim i parave.

Pjesëtarë të Ministrisë së Brendshme të Kantonit të Sarajevës kanë bastisur mjediset e Agjencisë së Inteligjencës dhe Sigurisë në Bosnje qysh në fillim të korrikut.

LEXO EDHE  Nga Karaburuni në Shkodër, bilanci për 24 orët e fundit

Bastija është kryer me urdhër të Gjykatës së Bosnjës, në kuadër të rastit të njohur si “Diploma”.

Në vitin 2019, Mehmedagicit i është anuluar diploma e vitit 2007 nga Fakulteti në Banja Llukë.

Ai pastaj ka dorëzuar dy diploma – nga Universiteti Amerikan dhe Fakulteti i Drejtësisë në Sarajevë.

Prokuroria ka nisur hetimet, pasi Mehmedagic nuk e ka përfshirë më herët diplomën e Universitetit Amerikan në biografinë e tij.