Ministrja e jashtme e Portugalisë Ana Paula Zacarias ka konfirmuar përmes një deklarate për shtyp, që nuk ka një datë për konferencën e parë ndërqeveritare për Shqipërinë dhe Maqedoninë e Veriut me BE-në.
Zacarias, e cila është njëherësh dhe zv. Presidentja e Bashkimit Europian për transparencën, tha se shtetet nuk kanë rëndë dakord për mbajtjen e konferencës së parë me të dy vendet.
Shkak për marrjen e vendimit negativ për të dy vendet e Ballkanit Perëndimor është vetoja që Bullgaria ka vendosur për Maqedoninë e Veriut, si pasojë e konfliktit të hapur mes dy vendeve, ndërkohë që shtetet e BE-së kanë vendosur që dy vendet tona të trajtohen në bllok.
“Nuk ramë dakord për caktimin e një date për konferencën e parë ndërqeveritare, e rëndësishme është që të mbahet gjallë prespektiva europiane e Ballkanit Perëndimor”, u shpreh ministrja e jashtme portugeze, vend i cili mban dhe presidencën e BE-së.
Debatet
Ministrat e Çështjeve Evropiane të BE diskutuan të martën miratimin e kornizave negociuese të Maqedonisë së Veriut dhe Shqipërisë, por nga raportimet, Bullgaria refuzoi të ndryshojë pozicionin e saj.
Debatet ishin të ashpra, veçanërisht në lidhje me Maqedoninë e Veriut dhe bllokadën Bullgare. Sipas tyre, Gjermania në veçanti shprehu mbështetje të fortë për fillimin e negociatave të pranimit të Maqedonisë së Veriut.
Bullgaria, megjithatë, refuzoi të ndryshoj qëndrim përkundër paralajmërimeve nga anëtarët e tjerë të BE se duke bllokuar zgjerimin, “BE po qëllon në këmbë veten”.
Sofja u paralajmërua edhe një herë se besueshmëria e të gjithë Bashkimit Evropian është në rrezik. Shumë shtete anëtare kritikuan pozicionin e Bullgarisë, thonë diplomatët e BE.
Përfaqësuesi i Bullgarisë vuri në dukje se “BE nuk mund të kuptojë shkallën e mosmarrëveshjes” midis Shkupit dhe Sofjes, duke shtuar se është një çështje evropiane. Për më tepër, ai tha se Bullgaria e gjen veten në një “pozitë të vështirë” për shkak të zgjedhjeve të ardhshme, të vendosura të zhvillohen në korrik.
Sidoqoftë, vendi nuk mund të garantojë që një qeveri politike do të heqë veton, nënvizojnë diplomatët evropianë.
Shumica e anëtarëve të BE janë kundër shkëputjes së Maqedonisë së Veriut dhe Shqipërisë. Diplomatët thonë se ky është një skenar i pamundur, “nëse gjërat nuk ndryshojnë deri në fund të ditës.”
