U qëllua 7 herë me ‘silenciator’, 3 pistat që po hetohen për ekzekutimin e Memajt

Sipas të dhënave paraprake të grupit hetimor, vrasja e biznesmenit Gramoz Mema mbrëmjen e të dielës ne Ksamil, është bërë me silenciator.

Ndonëse është raportuar rreth orës 22:30, ekzekutimi i tij afër banesës në fakt ka ndodhur pak më herët, por askush nuk ka dëgjuar krismat.

Dyshohet se 42-vjeçarit i është bërë pritë nga katër persona, të cilët e kanë qëlluar afër banesës së tij në zonën e njohur “Lagjia e tepelenasve” në Ksamil, aty ku Gramoz Mema jetonte me nënën e tij.

Mema kishte hapur një lokal në Ksamil ku qëndronte gjatë gjithë verës, ndërsa në dimër jetonte në Tiranë.

Në të kaluarën, ai kishte jetuar disa vite në Greqi dhe pastaj për disa vite të tjera në Angli dhe kjo është një nga pistat ku po hetohet. Gjithashtu një tjetër drejtim për motivin e vrasjes është edhe biznesi i tij në Ksamil, pra për konkurencë.

Një tjetër pistë është edhe ajo e ndonjë konflikti për lojërat e fatit, pasi dyshohet se ishte i përfshirë edhe në këtë biznes.

Në vendin e ngjarjes ku ai u vra u gjeten 7 gëzhoja, kurse Gramoz Mema me origjinë nga Tepelena humbi jetën rrugës për në spital. Disa persona janë shoqëruar në polici, por ende nuk ka një emër të dyshuar.