Grabitja e karburantit në Durrës/ Arrestohet menaxheri, zbardhet ngjarja

Policia ka zbardhur ngjarjen e djeshme në Durrës, ku u raportua për grabitje të një karburanti.
Sipas policisë grabitja është stimuluar nga menaxheri i firmës me qëllim justifikimin e shumave të mëdha të parave të xhirove ditore që i kishte humbur duke luajtur lojëra fati.

Blutë bëjnë me dije se ky i fundit është arrestuar nga policia. Gjithashtu në pranga ka rënë edhe pronari i lokalit që ushtronte veprimtarinë e kundërligjshme të lojërave të fatit, ku menaxheri i karburantit kishte humbur lekët duke luajtur lojëra fati.

Nga njoftimi i policisë mësohet se të arrestuarit janë Gert Farruku, 23 vjeç, menaxheri i karburantit;  Arsid Haxhija, 22 vjeç, pronari i lokalit që organizonte lotari të palejuara, ku dyshohet se shtetasi Gert Farruku ka humbur shuma të mëdha parash duke luajtur loto.

Materialet i kaluan Prokurorisë së Rrethit Gjyqësor Durrës, për veprime të mëtejshme për veprën penale “Vjedhja e kryer duke shpërdoruar detyrën” në ngarkim të shtetasit G. F., dhe “Organizimi i lotarive të palejuara” në ngarkim të shtetasit A. H.