Ish-ministri i Drejtësisë, Ylli Manjani, ka bërë tre propozime, në lidhje me partitë politike, për të cilat thotë se duhet të ndajnë një herë e mirë privaten nga publikja.
Në një postim në rrjetet sociale, Manjani shkruan se “Për mendimin tim ligji duhet të ndalojë:
1. Cdo politikan, kandidat apo partiak që të shkojë në mjedise private për të lypur vota.
2. Vendosjen e partive politike në godina private.
3. Përfshirjen e partive në jetën private të njerëzve”.
Sipas Manjanit, politika është një e mirë publike ndaj duhet zhvilluar në agora, në sheshin publik.
“Në kohët e sotme në hapësirat publike fizike, elektronike e mediatike.
Aty shpalosen idetë e pikpamjet dhe idetë.
Politikani derë më derë shkon vetëm për kodoshllëqe politike, jo për politikë. Mjedisi publik është vendi i shpalosjes së ideve. Në njedisin privat ka vetëm dallavere, shitje e blerje.
Partia në mjedise private është pronë private, jo aset publik.
Le pastaj ndërhyrja e partive në jetën private, të dhënat apo telefoninë private. Kriminale fare.”-thekson Manjani.
Gjithashtu ai shkruan se çdokush duhet të jetë mjaftueshmërisht i lirë të formojë një opinion nga informacioni që merr në sheshin publik të ideve, jo nga trokitja e derës apo zilja e celularit.
“Në ka gjë që ne kemi nevojë ta ndajmë njëherë e mirë kjo është ndarja e publikes nga privatja. Kemi nevojë që politika të jetë e mirë publike, jo vetëm e mirë private e atyre që e bëjnë.
Njerëzit duhet të jenë të lirë të arsyetojnë e të vendosin. Kjo liri nuk garantohet nëse politikani apo “ustai i votave” të vijnë në shtëpi, në telefon apo në vendin ku punon për të të intimiduar.
Çdokush duhet të jetë mjaftueshmërisht i lirë të formojë një opinion nga informacioni që merr në sheshin publik të ideve, jo nga trokitja e derës apo zilja e celularit.
Arsyetimi se kështu apo ashtu e ka edhe bota, nuk pi ujë fare. Sepse ajo botë ku referohemi e ka të ndarë publiken nga privatja. Neve jo.
Ndaj duhet një ligj i rreptë që politika të bëhet ekskluzivisht në mjedis publik.
Politikani gjendet në mjedis privat vetëm në shtëpinë e tij ose në një mjedis familjar apo shoqëror në kohën e tij/saj jo politike”-shkruan Manjani.
