Komuniteti shqiptari në Sheffield është tronditur nga vrasja e një të riu, që ishte vendosur në këtë qytet për një ‘jetë ëndrrash’
Armend Xhika u godit për vdekje me thikë në një sherr që shpërtheu në rrugët e Sheffield-it të enjten e kaluar në mbrëmje.
22-vjeçari ngeci në një përleshje që përfshiu një grup personash në rrugën Earl Marshal, në Fir Vale dhe në një tjetër pak më vonë në rrugën Kirton, në Pitsmoor.
Armendi u la jashtë repartit të urgjencës në Northern General Hospital nga një makinë, e cila më pas u largua teksa mjekët po përpiqeshin ta ndihmonin.
Një shok i tij bëri të ditur sot se Armendi kishte shkuar ilegalisht në Angli më 2018, ku besohet se jeton edhe motra e tij, për një jetë më të mirë për veten dhe familjen në Shqipëri. Më pak se tre vjet më pas, jeta e tij u shua tragjikisht nga një goditje me thikë.
Shoku tha se të rinjtë shqiptarë përpiqen dëshpërueshëm t’i largohen varfërisë së vendit të tyre dhe paguajnë deri në 26 mijë sterlina për të hyrë ilegalisht në Angli.
Ata hyjnë në borxhe ose me bankat, miqtë e të afërmit në Shqipëri, ose me bandat kriminale që iu ofrojnë hyrjen në Angli.
Shoku i Armendit tha se ai bënte disa punë.
“Vdekja e Armendit duhet të shërbejë si zgjim e t’i bëjë njerëzit të kuptojnë se çfarë po ndodh në Sheffield”.
“Në Shqipëri nuk ka punë dhe shpesh njerëzit paguajnë mijëra paund vetëm për të gjetur punë dhe edhe kur punojnë me orë të zgjatura fitojnë vetëm 300 paund sa për t’u ushqyer, mbajtur familjen dhe paguar për kujdes mjekësor. Jetojnë në varfëri ekstreme. Brezi i ri nuk e do atë jetë dhe vijnë këtu në Britani, si Armendi, për të ndihmuar familjen dhe për një jetë më të mirë për vete këtu”.
Ai thotë se grupet kriminale i shfrytëzojnë njerëzit si Armendi në Sheffield, duke e ditur që ata nuk kanë dokumentet për punë të ligjshme.
“Nëse njerëzi janë në borxhe dhe të dëshpëruar për pará ngaqë nuk kanë letra për mbështetje zyrtare, mund të bien pré e shfrytëzuesve”, vazhdon shoku i Armendit.
“Autoritetet duhet të kthejnë sytë nga brezi i ri shqiptar e t’i ndihmojnë e këshillojnë para se të shuhen jetë të tjera për shkak se përfundojnë me njerëzit e gabuar”.
Deri tani janë bërë pesë arrestime në kuadrin e hetimeve për vrasjen.
