Nga Boldnews.al
Ergys Verdho është një nga drejtorët që duhet të ishte të paktën në SPAK. Të mos flasim për hetim, ndalim apo arrestim. Ish paraardhësit e tij në detyrën e Drejtorit të Përgjithshëm të Rrugëve janë hetuar dhe arrestuar. Abuzimet kanë qenë të mëdha. Dhe, vazhdojnë të jenë. Mjafton që hetuesit të verifikojnë tenderat e muajve të fundit. Jo që nga marrja e detyrës, por të javëve të fundit dhe do të gjejnë abuzime të mëdha. Abuzime në vlerën e kontratës. Në s’kualifikimin e firmave. Me përzgjedhjen e fituesve, ku shumica kanë qenë afër fondit limit. Por, edhe preferenca për disa oligarkë, të tipit “Salillari”, “Gjikuria” etj, etj.
Por, deri më tani, përpos kallëzimeve dhe referimeve të shumta, SPAK po “fle gjumë”. Mosveprimet kanë sjellë që Verdho të hapë “thesin” para zgjedhjeve. Pak ditë më parë, BoldNeës raportoi se ARRSH ka hapur tenderin për rikonstruksionin e rrëshqitjeve në Borsh.
Plot 1.2 milionë euro të shqiptarëve po shpenzohen për tekat e Verdhos dhe Salillarit. Megjithëse kjo e fundit përfiton rreth 12 milionë euro nga mirëmbajtja, sërish paratë për këtë rrëshqitje janë nga taksat. Dhe, kur kaluan disa ditë nga ky tender, Verdho hap një të ri.
2 milionë euro për Tunelin e Krrabës
Disa ditë para zgjedhjeve, Ergys Verdho po shpejton që të boshatisë arkat e Drejtorisë së Rrugëve. Dy janë mundësitë; 1) Ose ka bërë sondazhe për zgjedhjet, ku PS-ja del humbëse, ose 2) Ka informacione për ndonjë hetim të mundshëm nga SPAK! Kjo e fundit ka pak gjasa që të ndodhë, ndërsa me shumë mundësi Verdho po shpejton që të bëjë “lekë për ditët e keqija që e presin”. Paraardhësi e tij u arrestuan dhe proceduan për abuzime disa herë më të ulëta se këto të Verdhos.
Ndërsa ky drejtor, po shpejton që të bëjë qokat e radhës. Sipas dokumenteve që disponon BoldNeës, ARRSH ka hapur tenderin me objekt mirëmbajtja e tunelit të Krrabës. Bëhet fjalë për një kontratë të re me afat 24 muaj. Fondi për këtë tender është 189.360.000 lekë pa TVSH. Me TVSH rreth 2 milionë euro. Tenderi do të zhvillohet në datën 5 maj, ndërsa ka dyshime se Verdho po bën qokat e fundit. Do t’ia japë të njëjtës firmë që e ka aktualisht, apo disa oligarkëve të tjerë që përmendëm më sipër?
Tiranë-Elbasan, “gropa” e zezë në buxhet
Një nga rrugët që ka kushtuar më tepër është padyshim Tiranë-Elbasan. Këta që janë këto ditë në pushtet iu duk shumë kostoja prej rreth 300 milionë euro. Por, pas 8 viteve në pushtet, kostoja e kësaj rruge është dyfishuar. Megjithëse rruga ishte inauguruar dhe kishim ngelur 1/3 e punimeve, sërish socialistët kanë shpenzuar për këtë pjesë edhe 300 milionë të tjera. Me kontrata të dyshimta, por edhe me gjyqe të humbura në arbitrazh, rruga është shndërruar në një gropë të zezë në buxhetin e shtetit që po varfërohet në maksimum këto ditë para zgjedhjeve. Dhe, sikur mos të mjaftonte kjo kosto, sërish shpenzohen!
Kësaj herë rreth 2 milionë euro vetëm për mirëmbajtjen e tunelit. Në dokumente thuhet se kjo kosto ka ardhur nga sasia e trafikut që lëviz përgjatë tunelit që është rritur me kalimin e viteve, dhe konkretisht eshte me një mesatare ditore 15 000 mjete në ditë shifër e cila shumfishohet në periudha të veçanta të rasteve të festave apo dhe pushimeve verore e dimërore. Këto para po jepen për pagesat e menaxherit të tunelit dhe të stafit të tij. Synohet që këta punonjës të jenë privatë dhe duhet t’i përgjigjen nevojave të ARRSH dhe të OSHEE. Apo edhe të Policisë së Shtetit. Pra, punë që mund t’i bënin disa punonjës të ARRSH, kostoja e së cilëve ishte disa herë më e ulët sesa vlera e tenderit të akorduar. Por, si në gjitha pasuritë publike, edhe kjo vepër menaxhohet nga privatët.
