Vaksinat anti-Covid, Bino e pranon: Kemi raste të tronbozave te të vaksinuarit

Për herë të parë, Silva Bino, shefe e sëmundjeve Infektive në ISHP ka pranuar se në Shqipëri ka pasur raste të problemeve që shkaktohen nga vaksinat anti-Covid, të cilat po shqyrtohen nga një grup ekspertësh.

Deklaratat Bino i bëri gjatë prezantimit të një studimi ku tha se 60% e shqiptarëve pranojnë vaksinimin kundër koronavirusit, ndërkohë që 11 % kanë marrë dozën e parë anti Covid dhe rreth 20 mijë persona mund të quhen të imunizuar me të dyja dozat.

“Udhëzime për të njohur dhe për të hetuar këto ngjarje tromboembolike dhe ngjarje të tjera pas vaksinimit. Kemi pasur edhe trombocitopeni pas vaksinimit edhe nga Pfizer dhe nga të tjerat në mënyrë që këto të adresohen për të parë shkakun”, ka thënë ajo.

Bino pranoi se nisja e vaksinimit me AstraZeneca në një kohë kur shumë shtete ishin skepktike ndaj saj nuk ishte një vendimmarrje e lehtë.

ISHP po kryen studime rreth efektivitetit të vaksinës tek personeli shëndetësor në 5 spitale jo Covid. Deri tani nuk ka pasur mjekë apo infermierë të infektuar pas dozës së dytë të Pfizer.

Ndërkohë në të gjithë vendin janë kryer rreth 346 mijë vaksinime.