Pranga shqiptarit të rrjetit të trafikut të drogës Spanjë-Itali

Nëntë të arrestuar dhe 19 të tjerë në kërkim në Bologna dhe në rajonet e Lombardisë dhe Toskanës në Itali.

Ky është bilanci i operacionit policor të koduar “Shoferët”,  që e mori emrin nga numri i madh i makinave që u përdorën nga kriminelët, të moshës 20 deri në 30 vjeç, për të sjellë sasi të mëdha droge në sheshet dhe dyqanet në zonën e poshtme të Bolonjës, në kufi me provincën e Ferrara.

Me ndihmën e helikopterëve dhe njësive të qenve, Karabinierët zbatuan urdhër-arrestet e lëshuara nga Gjykata e Bolognas, me kërkesë të Anti-Mafias kundër shtatë shtetasve italianë, një ekuadoriani dhe një shqiptari.

Sipas autoriteteve italiane, lënda narkotike vinte nga Spanja.

Policia arriti të sekuestrojë 28 kg kokainë, hashash dhe marijuanë si dhe 260 mijë euro.