Kuburja e zbrazur nga fryma e Ramës!

Nga Boldnews.al

Edhe kjo kishte mbetur pa ngjarë në Kavajë. Gjithçka e kishte provuar ky qytet, mbanin mbi shpinë një kryebashkiak me tre emra, të dënuar për përdhunim në grup dhe trafik droge, por me izmin e Ramës, Roshi u bë Rilindas i paprekshëm. Iku ai po vijnë të tjerë lokalistë me sy të errësuar nga abuzimi, duke tërhequr pas vetes persona me të shkuar kriminale, që për Rilindjen janë “çuna boba” sepse kanë vrarë e prerë.

I tillë konsiderohet për Rilindjen edhe Ndiçim Jonuzi (Tahiri), i cili qëlloi me armë zjarri duke plagosur sekretarin e përgjithsmë të PD-së në Kavajë Bledar Okshtunin. Bashkë me shkrehësin e kobures, ishin edhe dy drejtuesit e lartë të Policisë Bashkiake të Kavajës Dorjan Tropolini dhe Markel Shtylla. Duhet të ishin prangosur, por u lanë të qetë nga policia që nuk guxon të zgjasë prangat në duart e përgjakura, vetëm se ato duar shërbejnë për të marrë dhunshëm vota për Edi Ramën.

Ndërsa vendin e ka në qeli, atentatori shfaqet në “video-konferencë” duke pretenduar se ka bërë shumë për PD-në dhe ishte një i “djathtë”. Kaq deshi kryeministri ynë për t’i dalë në mbrojtje Çimit që shkreh kobure… Por vetëm pak minuta më vonë u publikuan fotot që tregonin atentatorin ndërsa drekonte krah kryebashkiakut të Kavajës dhe dy bashkëpunëtorëve të tij që kreu plagosjen, Dorjan Troplinit dhe Markel Shtyllës.

Ai nuk ka emër tjetër përveçse një personazh i botës së krimit që kërkohet edhe në Itali për vrasje, por koburen e shkrehu me frymën e Ramës. Personazhe të tillë kanë gjetur strehë në oazin e pushtetit dhe janë të gatshëm të vrasin për partinë që i mban të lirë, u jep benefite deri në tendera dhe bëjnë ligjin e xhunglës me vulën e pushtetit në xhep.

LEXO EDHE  Kultivonin lëndë narkotike, arrestohen 2 persona në Krujë

Në Kavajën e vogël i njohin të gjithë këta personazhe, por kryeministri nuk lë nënën e djalit të plagosur as të qajë, nuk e lë të plagosurin as të rënkojë. Krimineli për fat të keq ka ngjyrë dhe ajo është miksimi mes të kuqes gjak dhe haluçinacionit rozë, nga ku ka dalë një sekt i ri, ngjyrat e Rilindjes.

Vetë emri nuk shkon, sepse Rilindja po vret edhe në prag të zgjedhjeve. Marina e pushtetit shkon deri në pikën e provokimit dhe shantazhit ku pasi të qëllon natën, të përçmon ditën, duke i dhënë edhe më shumë fuqi personave me kobure në brez, që gjezdisin të lirë nëpër qytet në mbrojtje të pushtetit.

Gishti që shkrehu këmbëzën nuk është i Ramës, por fryma që përçohet edhe pasi plumbi shkon deri në koçkë është e tij dhe e personave që e rrethojnë. Qytetarët e Kavajës me të drejtë edhe mund të tremben, sepse kobures nuk i përgjigjen me kobure, as shantazhit me shantazh. Por, “çuna si Çimi” pushteti ka shumë dhe sot janë shpërndarë kudo, duke u bërë patronazhistë të së keqes, aq sa i japin vetes atributin për të tentuar t’i marrin jetën tjetrit, vetëm se përse mendon ndryshe dha kë bindje politike të kundërta.