Kreu republikan, Fatmir Mediu, i cili kandidon me numrin 7 në listën e Qarkut të Tiranës për koalicionin “Aleanca për Ndryshim”, zhvilloi takime me banorë të Njësisë Administrative nr.1, në Tiranë.
Mediu theksoi se kryeministri Edi Rama kërkon të shpopullojë vendin. “Ajo që është e rëndësishme është që shqiptarët të dinë të dallojnë se kush është e keqja dhe të bashkohen për të bërë më të mirën,” tha Mediu.
Ai u shpreh se Edi Rama për interesa të tij politike kërkon të shpopullojë Shqipërinë, kërkon që Shqipëria të zbrazet dhe të sjellë këtu njerëz nga Bangladeshi, nga Pakistani apo nga India, sepse i do ata si shërbëtorë të pushtetit të tij, se mentaliteti i Ramës është mentaliteti i sundimtarit, se ai mund të bëjë si të dojë me njerëzit.
“Prandaj është shumë e rëndësishme që ne të gjykojmë drejt në këto zgjedhje, për të ndalur hajninë, për të ndalur antivlerat, për të ndalur një njeri i cili nukka më asgjë të përbashkët me ne, për të ndalur një qeveri e cila do vazhdojë t`a thellojë akoma më tej krizën.
A janë fëmijët tanë sot në mundësinë për t`u arsimuar dhe edukuar, për t`u bërë të vlefshëm për familjen e tyre? A e kanë ata mundësinë për të ndërtuar një familje në Shqipëri sot? A është kjo Shqipëria që kemi besuar dhe ëndërruar? A është kjo Shqipëria që na jep dinjitet dhe vlerë?
Po ashtu të shikojmë dhe tek prindërit tanë. A janë ata sot krenarë me atë që shohin, me vendin e tyre? A e gëzojnë dot ata familjen e tyre të bashkuar, me nipër, me mbesa, me fëmijë, që të gëzojnë së bashku?
Sot kemi ardhur në momentet më të trishta të historisë sonë kombëtare, për faktin që rreth 490,000 të rinj dhe të reja, intelektualë, profesionistë, janë larguar nga Shqipëria. Vetëm Kontrolli i Lartë i Shtetit ka konstatuar se janë 7.2 miliardë euro që regjimi i korruptuar dhe i inkriminuar i Edi Ramës ka vjedhur nga xhepat e shqiptarëve , nga taksat tona.
Ajo që është e rëndësishme është që shqiptarët të dinë të dallojnë se kush është e keqja dhe të bashkohen për të bërë më të mirën. Unë këtë bashkim të opozitës e shikoj si një shpresë të bashkimit të shqiptarëve, të majtë dhe të djathtë,në 25 Prill, kundër këtij regjimi të korruptuar.
25 Prilli është ballafaqimi i shqiptarëve që duan shtet, liri dhe të drejta dhe nga ana tjetër Edi Ramës dhe regjimit të tij të korruptuar që vetëm shkatërron shtetin, vlerat dhe cdo interes të qytetarit”, tha Mediu.
