️Ambasada amerikane në Tiranë ka shprehur edhe njëherë qëndrimin e saj lidhur me zgjedhjet e 25 prillit.
Pas deklaratës së Ambasadores Yuri Kim dhënë mbrëmjen e djeshme, Ambasada e SHBA duke cituar diplomaten, thekson se SHBA nuk kanë kandidat të preferuar për zgjedhjet e 25 prillit.
“A kemi një kandidat të preferuar? Jo, nuk kemi. Nuk është ky pozicioni i Shteteve të Bashkuara. Ajo për të cilën vrasim mendjen janë institucionet dhe proceset.
Dhe, prandaj nuk flas për këtë kandidat apo atë kandidat, këtë apo atë parti, por flas për rëndësinë, rëndësinë kritike që ka që të sigurohemi që rregullat dhe proceset janë të ndershme, janë transparente, që fusha e lojës është e njëjtë për të gjithë, dhe që rregullat të zbatohen edhe në kohë, që të gjithë të kenë të njëjtat shanse.
Kjo është ajo për të cilën kemi interes”, publikohet në faqen zyrtare të Ambasadës së SHBA në rrjetin social.
