Kreu demokrat Lulzim Basha u shpreh mbrëmjen e sotme se Kryeministri Edi Rama po përdor vaksinimin si një proces politik.
Basha tha se askush nuk di të thotë sepse shkon Kryeministri në vendet e vaksinimit, përveç faktit se po bën fushatë.
“Ç´punë ka Kryeministri që shkon në vendet e vaksinimit? Pse nuk bën transparent këtë proces, por në fillim fare nuk pranoi të deklaronte as vendin nga erdhën vaksinat e para? Nëse ka një dështim të procesit të vaksinimit kjo ka të bëjë me mungesën e transparencës.
Nëse Edi Rama do kishte problem Covid-19 nuk do i jepte 23 mln euro inceneratorit të Fierit, por do shtonte autobuzët në Tiranë, ku njerëzit po shtypen si sardele”, tha Basha.
Kreu demokrat tha se vaksinat që po vijnë në Shqipëri po paguhen me paratë e taksapaguesve shqiptarë. Sipas tij, Kryeministri duhet të deklarojë se si janë siguruar vaksinat që kanë ardhur, ndërsa shtoi se qeveria e tij do të garantonte stokun më cilësor për vaksinat.
