Nënkryetari i LSI-së, Petrit Vasili, u shpreh sot se Kryeministri Edi Rama, Kryebashkiaku Erion Veliaj dhe Sekretari i Përggjithshëm i Këshillit të Ministrave, Engjëll Agaçi, duhet të hetohen, pas vendimit të Arbitrazhit që detyron Shqipërinë të paguajë mbi 120 mln euro në favor të biznesmenit Becchetti.
Vasili tha se ky është dënimi më i madh që njeh historia e Shqipërisë dhe që është dhënë nga arbitrazhi ndërkombëtar, apo ndonjë gjykatë tjetër ndaj Shqipërisë, dhe shqiptarët dënohen jo për faj të tyre, por për faj të kryeministrit të tyre.
“Kryeministër, i cili shpërdoron ligjet e shtetit, i shkel dhe i dhunon këto ligje dhe kërkon që nëpërmjet arbitraritetit të pushtetit të tij të mbyllë gojën e medias, sepse e vërteta i dhemb dhe e tmerron Edi Ramën dhe kjo e vërtetë nuk duhet të dalë kurrë sipas tij.
Është e qartë që të tre këto personazhe, Edi Rama në krye, udhëzues, frymëzues dhe ekzekutues, Erion Veliaj dhe Engjëll Agaçi janë qartësuar edhe në vendimin e Gjykatës ndërkombëtare si tre shtyllat ku bazohet dënimi, i cili dënon shqiptarët me 120 milion euro në kohët shumë të vështira të pandemisë, në kohët pas tërmetit, por që do ishte një dënim shumë i rëndë, i tmerrshëm dhe i pamerituar në çdo kohë.
Është qartësuar që Edi Rama shantazhoi dhe paragjykoi dhe çoi falangat e tij të krimit shtetëror kundër biznesmenit, vetëm e vetëm që ti mbyllte gojën. Erion Veliaj e kërcënoi haptas dhe qartë duke i thënë që qeveria do të jetë armiku juaj. Ç’ është ky bastard që guxon të thotë që qeveria do të jetë armiku i një biznesmeni, sepse ky paska zënë me gojë Erion Veliajn dhe e paska kritikuar atë?
Ndërsa tjetri, Sekretari i Përgjithshëm, që ç’ hyn Sekretari i Përgjithshëm, ky njeri teknik në çështjet politike dhe në kërcënimin e medias, i kërkon dhe i ofron mediat e tjera mike të dashura të qeverisë, për të negociuar dhe për të dhënë e për të marrë në mënyrë që të mos i kundërvihen qeverisë. Pra, çdo gjë, çdo mjet, me çdo kusht që të mbyllet goja e një mediaje dhe në këmbim të kësaj dënohen shqiptarët me 120 milion euro në mënyrën më të padrejtë dhe më të poshtër”, tha Vasili.
Sipas tij, sot drejtësia është e thirrur në provë.
“Kjo çështje ulëret dhe kjo çështje ka përgjegjësi individuale të drejtpërdrejt mbi Edi Ramën, Erion Veliaj dhe Engjëll Agaci.
Asnjë sekondë drejtësia nuk mund të presë më. Shqiptarët nuk mund të durojnë një drejtësi e cila dënon egërsisht për 30 mijë lekë apo 50 mijë lekë të vjetra energji elektrike të papaguar shqiptarët e ku disa prej të cilëve kanë humbur jetën në burg e të shikojnë sesi miliardat shpërdorohen nga një bandë mafiozësh në qeveri, vetëm e vetëm, për të mbyllur gojën, për të mbyllur të vërtetat. Shqiptarët e dinë dhe ne e dimë.
Dhe të gjithë e dinë, që Edi Rama kërkon njerëz pa gojë dhe pa votë, sikurse kërkon që shqiptarët ti zëvendësojë me bangladeshas, të cilët nuk dinë shqip dhe nuk kanë të drejtë të votojnë”, tha Vasili.
