Zëdhënësja e fushatës së PD, Floriana Garo, përmes një deklarate, u shpreh se shqiptarët nuk duhet të lejojnë që Edi Rama të marrë edhe një mandat të tretë si Kryeministër, ndërsa për 8 vite nuk na çoi asnjë hap përpara drejt BE.
Ajo shtoi se çdo qytetar shqiptar e di se nëse ne nuk bëhemi pjesë e Bashkimit Europian, ne nuk do të jemi në gjendje të bëhemi një vend i zhvilluar.
“Për 8 vite, Rama nuk na çoi asnjë hap përpara drejt BE-së. Rama nuk do të sjellë ndryshim në Shqipëri.
Dështimi po troket në derë edhe një herë. Ne nuk duhet t’ia hapim derën atij. Thuajini jo Ramës! Shqipëria duhet të ecë përpara.
Ne nuk mund ta lejojmë atë të vazhdojë edhe një mandat tjetër”, tha Garo.
Sipas saj, Lulzim Basha, që ka shkëlqyer në marrëdhëniet me jashtë dhe ia ka dalë që të anëtarësojë Shqipërinë në NATO dhe që bëri realitet udhëtimin pa viza, është lideri i duhur për ta anëtarësuar plotësisht Shqipërinë në Bashkimin Europian.
“Më 25 prill, ne do të votojmë për Bashën dhe për Partinë Demokratike që t’i sjellim shpresë Shqipërisë”, tha Garo
