Nga Boldnews.al
Ka sjellë keqardhje të madhe, reagim masiv qytetar dhe dhimbje humbja e jetës së 32-vjeçarit Arjan Sala, i cili mbeti i mbyllur në një magazinë të qendrës tregtare në periferi të Tiranës, i shkrumbuar nga zjarri. Më shumë se ky incident fatkeq, që mund të ndodhë kudo, e në çdo kohë, ka vrarë apatia e institucioneve shtetërore për të ndërhyrë në kohë. Tre netë dhe dy ditë qëndroi trupi i të riut me detyrë shef i sigurisë fizike në mbetjet e shkrumbuara të magazinës.
Zjarrfikësit, edhe pse u gjendën aty pak kohë pasi ndodhi ngjarja, nuk ishin në gjendje të ndërhynin, në mos t’i shpëtonin jetën, të paktën mos linin në ankthin e pritjes familjarët e të ndjerit, që la pas edhe një fëmijë të mitur. Zjarrfikësit e Tiranës, nuk kishin mjetet e duhura, nuk ishin të trajnuar sa duhet dhe mbi të gjitha doli zbuluar edhe një herë si shumë herë apatia e plotë e institucioneve për të ndërhyrë në raste fatkeqësish.
Kështu ndodhi edhe me tërmetin e 26 nëntorit 2019, kur u desh ardhja e ekipeve të shpëtimit nga Kosova që të fillonte lëvizja e inerteve që kishin rënë mbi trupin e qytetarëve. As edhe një qen gjurmues nuk kishte ekipi ynë i shpëtimit, sepse u zbulua se fondet i kishin zhdukur “qentë me dy këmbë”, që mbajnë poste të larta dhe mbrohen nga petku i kostumit të Rilindjes.
Sot askush nuk është ndaluar për përgjegjësinë e vdekjes së Arjanit. Mbetet enigmë se përse nuk ishte aktiv sistemi i shuarjes automatike të zjarrit. Nuk mban kush përgjegjësi për sigurinë teknike nëse magazina kishte dalje emergjence dhe përse zgjati aq shumë operacioni i kërkim-shpëtimit i cili u mbyll pas tre ditësh, atëherë kur vetishëm u dogj gjithçka.
Sipas dëshmive, 32-vjeçari shpëtoi disa jetë duke nxjerrë jashtë punëtorët e ngarkim-shkarkimit që gjendeshin në magazinë, por mbeti vetë aty, i fundit në atë tmerr flakësh dhe tymi. Makabriteti zgjati shumë, gati në kufijtë e të paimagjinueshmes, pasi në një dreq magazine pak metra katrorë zjarrfikësit as që tentuan të futeshin, pasi nuk kishin veshje dhe mjete speciale kundër zjarrit. Rendnin me zorra uji në duar që vinin nga botet e lodhura ky gjsmën e derdhin në rrugë.
Kjo ishte pamja e frikshme e një “filmi horror” që regjinë qëndrore e ka pikërisht në institucionet shtetërore që ishin të zëna me fushatën, në kërkim të votës. Kryesisht në rrjetet sociale qytetarë të shumë shprehën keqardhje, por ka edhe çudira malinje… “Minjtë e magazinave të partisë”, ata që janë punësuar për të ndjekur çdo reagim në rrjetet sociale, zbuluan se mllefi qytetar ishte i madh dhe këtu ndërhyri qeveria…, për të bërë atë që di të bëjë më mirë, propagandë dhe shfaqje para kamerave sikur pikëllohen për ngjarje të tilla. Pritet që Arjan Sala të shpallet Dëshmor i Atdheut.
Po, ai në të vërtetë është hero, pasi la jetën e tij për të shpëtuar të tjerët. Ishte shefi i sigurisë fizike dhe nuk kishte për detyrë të shuante flakët, por instikti dhe ndjesia njerëzore e bënë atë hero. Nga ata të rinj të heshtur që punojnë me ndershmëri qoftë edhe për një pagë modeste, por me të mbante familjen dhe atë djalë të mitur i cili nuk është në gjendje të kuptojë se babain nuk e ka më.
Më shumë se për ta shpallur dëshmor, duke bërë edhe shëtitjet e radhës me dekorata në duar tek ata familjarë të vrarë në shpirt, institucionet, qëndror dhe lokal duhet të kishin investuar në ekipet e shpëtimit. Para janë hedhur për “modernizimin”, por kur vjen momenti për të reaguar aty dalin zbuluar, sepse fondet se kush i përpin, edhe më shpejt se flakët… Ama një zgjidhje e kanë gjetur, pasi të lenë të vdesësh, që edhe trupin ta gjejnë pas tre ditësh, në fund lahen me ujin e mëkatit duke të shpallur dëshmor.
