Kryeministri Edi Rama, i akuzuar shpesh se ka kapur reformën në drejtësi, nga Berati nuk ka nguruar t´i caktojë SPAK agjendën e punës së tij.
Në kuadrin e fushatës për zgjedhjet e 25 prillit, Rama sulmoi sërish Presidentin Ilir Meta dhe ish-kryeministrin Sali Berisha, që sipas tij janë dy njerëzit kryesorë që duan të pengojnë dhe frenojnë procesin e reformës në drejtësi në Shqipëri.
Edi Rama paralajmëroi se goditjet e SPAK-ut do të vazhdojnë dhe sipas tij, vazhdimi mund të lëndojë politikanë majtas e djathtas.
“Saliu me Ilirin hallin kryesor kanë drejtësinë. E keni dëgjuar Ilirin që i vjen fjala burg si bukë. Një president që flet për burgun sikur vë shenja pikësimi gjatë fjalisë, është në hall në stres dhe problemi i tij kryesor është si ta frenojë këtë proces.
Drejtësia po pastrohet nga llumi, por ka pasur kaq shumë sa kjo punë nuk bëhet sa hap e mbyll sytë. Goditjet e SPAK-ut kanë filluar dhe do të vazhdojnë, por vazhdimi mund të lëndojë politikanë majtas dhe djathtas, por shkon në drejtim të duhur për njerëzit e zakonshëm të këtij vendi”, tha Edi Rama.
Megjithëse SPAK u ngrit si një institucion i ri në kuadrin e reformës në drejtësi, deri më sot asnjë prej zyrtarëve të lartë të denoncuar, ish-ministra, ministra apo Kryebashkiakë, nuk janë marrë nën hetim, edhe pse denoncimet kanë pasur të bëjnë nga shembja e Teatrit Kombëtar te tenderat e zhvilluara nga Ministria e Shëndetësisë dhe ajo e Mbrojtjes, të konsideruara si sekret, në kohën e pandemisë.
