Nga Boldnews.al
Në vitin 2016, kur Shqipëria ishte kanabizuar nga Veriu në Jug, organizata ndërkombëtare Transparency International raportoi për suksesin e qeverisë shqiptare në çmontimin e “bazës” së Lazaratit.
Raporti nuk kishte asnjë kritikë për dështimin e autoriteteve në parandalimin e lulëzimit të kanabisit në të gjithë territorin e vendit dhe bashkëpunimin haptaz të zyrtarëve policorë me bosët e narko-trafikut.
Ai raport u përdor nga Edi Rama për politikë të brendshme, duke ia kundërvënë kujtdo që tregonte realitetin e lulëzimit të drogës në Shqipëri.
Nga ana tjetër, raporti shkaktoi pakënaqësi në një pjesë të konsiderueshme të opinionit publik, nga ku lindën aludimet se “Transparency International” nuk njihte ose nuk donte të shihte realitetin shqiptar; se drejtuesit e saj ishin të lidhur me “Soros”, një fondacion që mbështet fuqishëm kryeministrin Edi Rama; apo edhe më tej se qeveria, me paratë e drogës, ka blerë përfaqësues ndërkombëtarë.
Mund të ishin të vërteta të gjitha këto, ose ndoshta një pjesë e tyre. Por, ata që kuptojnë politikën e hollë ndërkombëtare, nuk rudhën buzët nga ai raport i “Transparency International”.
Organizata ndërkombëtare, megjithëse formalisht është e pavarur nga politika, gjithësesi ka treguar se është pararendëse e qëndrimeve zyrtare ndërkombëtare.
Pra, për ata “mendje-hollë”, raporti “pa kanabizim” i Transparency International, ishte një sinjal i qartë se qeveria e Edi Ramës kishte mbështetje ndërkombëtare.
Në vitin 2016, “Rilindja” ishte në mesin e mandatit të saj të parë. Në Shqipëri po kalonin disa fije të rrezikshme terrorizmi dhe gjëja e fundit që do të donin partnerët ndërkombëtarë, sidomos amerikanët, ishte një lëvizje e fuqishme tektonike në shtetin shqiptar.
Në atë kohë, termi më i preferuar ishte “stabilo-kracia” e Shqipërisë dhe ajo u realizua më së miri nga ambasadorë të rëndësishëm në Tiranë, të mbështetur edhe nga organizma jo-qeveritarë me peshë globale.
“Kanabizimi” ishte një problem irelevant, në shqetësimet madhore për sigurinë globale që kishin agjencitë e huaja të inteligjencës.
Ky qëndrim është përmbledhur më së miri nga deklarime të ish-ambasadorit amerikan, Donald Lu, i cili në takime konfidenciale shprehej se “kanabisi nuk është problem për Amerikën”.
* * * *
Pesë vjet më pas, në Mars 2021, “Transparency International” publikon një raport, i cili që në titull e jep qartë mesazhin: “Zbërthimi i kapjes së shtetit në Shqipëri 2008-2020”.
Raporti ka marrë episode të lidhjes së politikës me korrupsionin dhe krimin e organizuar në një periudhë mbi një dekadë.
Por, megjithatë, fokusi ose rastet më problematike i referohen qeverisjes së Edi Ramës, sidomos mandatit të dytë të tij.
Raporti përmend dështimin e autoriteteve shtetërore në shkëputjen e lidhjeve mes politikës dhe krimit të organizuar që blen vota dhe pushtetin.
“Transparency International” flet për kapjen e drejtësisë ngë qeveria.
Mbi të gjitha, raporti kritik flet për “kapjen e Parlamentit” dhe miratimin e ligjeve me interes ekonomik, nga të cilët përfitojnë emra të veçantë.
Thelbi i raportit ishte një akuzë, thuajse e drejtëpërdrejtë, për kryeministrin Edi Rama. Duket qartë se vigjiluesit ndërkombëtare e kuptuan se kryeministri shqiptar e shndërroi teorinë e “stabilo-kracisë” në një mjet për të ndërtuar një lloj feudi anadollak, duke përqëndruar të gjithë pushtetet në duart e tij, përfshirë edhe “Reformën në Drejtësi”.
Tashmë, në fund të mandatit të dytë, Edi Rama merr një sinjal të qartë se “vaji i kandilit” të pushtetit të tij ka përfunduar.
Këtë e ka kuptuar qartë kryeministri shqiptar, edhe para publikimit të raportit të “Transparency International”.
E ka kuptuar, që kur ka nisur të kërkojë “zgjidhjet” për hallet e veta në Stamboll dhe në vendet arabe.
I kërkon zgjidhjet tek “dhuratat” turke, ruse e kineze, siç po ndodh me vaksinat, një orientim që kurrë më parë nuk është parë nga qeveritë shqiptare e post-komunizmit.
Ndaj sot ka vendosur të hesht për raportin e “Transparency International”, me shpresën se qytetarët, votuesit, nuk e kuptojnë se kandili i tij politik është në grahmat e fundit.
