Nga Boldnews.al
Skënder Brataj, një nga drejtorët që ka marrë shumë kompetenca gjatë pandemisë, vijon të shpenzojë me “thasë” para’ publike. Në vitin 2018, Partia Demokratike akuzoi Bratajn se kishte shpenzuar plot 450 milionë lekë për uniforma. Dhe, në atë kohë, PD-së i dukej një shifër shumë e fryrë!
Po në vitin 2021?! Sipas dokumenteve që disponon BoldNews, Brataj e ka çuar këtë shifër në plot 800 milionë lekë! Dhe, po ti shtosh edhe TBSH-në prej 20% shifra shkon në rreth 1 miliardë lekë të vjetra. Një shifër e çmendur në kohët ku po jetojmë, ku çdo qindarkë e dalë nga taksat tona duhet të kontrollohet. Por, me justifikimin e Covid 19 nëpër këmbë, Brataj ka filluar të shpenzojë pa kufij.
Disa javë më parë, kreu i Urgjencës Mjekësore, Skënder Brataj, shpenzoi plot 143 milionë lekë për të blerë këpucë. Ndërkohë, së fundmi, ai ka kërkuar që të blihen edhe uniforma. Sipas dokumenteve që disponon BoldNeës, Agjencia e Blerjeve të Përqendruara ka hapur një tender me objekt “Blerje uniformash për Qëndrën Kombëtare të Urgjencës Mjekësore”.
Afati i marrëveshjes është 24 muaj, ndërkohë fondi për këtë tender është 79,290,000 lekë. Me TVSH, 96 milionë lekë të rinj, ose rreth 1 miliardë lekë të vjetra. Uniformat janë kërkuar vetëm pas 3 muajsh nga lidhja e kontratës, ndërkohë tenderi do të kryhet në datën 15 prill, disa ditë para zgjedhjeve.
Sipas dokumenteve shoqëruese, Urgjenca Kombëtarë Mjekësore ka kërkuar 1000 xhupa dimërorë, 1000 jelekë, 1000 pulovër dimërore, 1000 bluzë me mëngë të shkurtra, 1000 pantallona verore dhe 1000 pantallona dimërore. Dhe, sipas vlerës së parashikuar në tender 1 miliardë, rezulton se një veshje e kompletuar do të kushtojë plot 1 milionë lekë.
Në vitin 2018, Urgjenca Mjekësore reagoi pas deklaratës së PD, e cila akuzoi ministrinë e Shëndetësisë se ka vjedhur në tenderin 450 milionësh. Sipas Urgjencës, çmimi dhe specifikimet teknike janë deklaruar publikisht. Uniforma standarte është e përbërë nga 10 pjesë, në total 3.760 copë, për 366 punonjës. Ndërkohë, standartet janë ato ndërkombëtare për shërbimin e urgjencës, që nga xhupat me visibilitet të lartë, deri tek materiali i i pa përshkueshëm, dhe me elemente mbrojtëse për personelin mjekësor nga infeksionet. Por, nëse edhe vetë Urgjencës iu duk normale, 450 milionë, po pse e kanë dyfishuar këtë çmim?!
