Shtetet e Bashkuara e kanë paralajmëruar Britaninë e Madhe se mund të përballet me taksë deri në 25 për qind ndaj disa eksporteve britanike si hakmarrje për vendosjen e një takse nga Mbretëria e Bashkuar ndaj kompanive të teknologjisë.
Sipas një liste të publikuar nga administrata e presidentit Joe Biden, nga kjo taksë mund të goditen qeramikat, produktet e kozmetikës, disa lloje të rrobave, pajisjet për lojëra kompjuterike dhe mobiliet.
Me këtë taksë pritet të shtohen të hyrat për 325 milionë dollarë, aq sa ShBA-ja beson se do të grumbullojë Britania nga taksa ndaj kompanive të teknologjisë, shkruan BBC.
Një zëdhënës i qeverisë britanike tha se qeveria dëshiron të sigurohet që kompanitë e teknologjisë ta paguajnë pjesën e duhur të taksave. “Nëse ShBA-ja e vazhdon procesin e zbatimit të këtyre masave, ne do t’i shqyrtonim të gjitha mundësitë për t’i mbrojtur interesat dhe industrinë e Mbretërisë së Bashkuar”, tha ai.
Sidoqoftë, Uashingtoni duket se nuk do të ndalet, duke vlerësuar se taksa ndaj shërbimeve digjitale ka atribute të paarsyeshme, diskriminuese dhe të rënda.
Shtetet e Bashkuara i kanë zhvilluar procedurat kundër taksave të ngjashme edhe ndaj Indisë, Austrisë dhe Spanjës, por masat kundër Bashkimit Evropian në tërësi nuk janë zbatuar.
